काठमाडौं। कैलाश हेलिकप्टर सर्भिसेस् लिमिटेडले आइपीओ जारी गर्ने भएको छ । हेलिकप्टरले जारी पूँजी ३५ करोडको १० प्रतिशत अर्थात् ३ लाख ५० हजार कित्ता सेयर जारी गर्ने भएको हो ।
कम्पनीले आइपीओ जारी गर्नको लागि बिक्री प्रबन्धकमा मुक्तिनाथ क्यापिटललाई नियुक्त गरेको छ । माघ ३ गते आयोजित एक कार्यक्रममा कैलाश हेलिकप्टरको तर्फबाट प्रबन्ध संचालक प्रताप जङ्ग पाण्डे तथा मुक्तिनाथ क्यापिटलको तर्फबाट प्रमुख कार्यकारी अधिकृत कबिन्द्र ध्वज जोशीले सम्झौतापत्रमा हस्ताक्षर गरेका हुन् ।
कैलाश हेलिकप्टर कम्पनीले आर्थिक वर्ष २०७९/२०८० को मुनाफाबाट आफ्ना सेयरधनीहरुलाई ५ प्रतिशत बोनस सेयर र १० प्रतिशतका दरले नगद लाभांस वितरण गरेको छ । उक्त बोनस सेयर वितरण पश्चात कम्पनीको चुक्ता पूँजी रु.३१ करोड ५० लाख रहेको छ । कम्पनीको किताबी मुल्य १४६.२९ कायम रहेको कम्पनीले जनाएको छ ।
