">
काठमाडौँ । कामना सेवा विकास बैंकको नाफा ३२.१९ प्रतिशतले बढेको छ । बैंकले सार्वजनिक गरेको चालु आर्थिक वर्षको दोस्रो त्रैमाससम्मको अपरिस्कृत वित्तीय विवरणअनुसार बैंकको खुद नाफा ३२.१९ प्रतिशतले बढेको हो । यसअवधिमा बैंकले कुल २५ करोड ६९ लाख रुपैयाँ खुद नाफा आर्जन गरेको छ । जबकी गत आर्थिक वर्षको सोही अवधिमा बैंकको खुद नाफा १९ करोड ५८ लाख रुपैयाँ रहेको थियो ।
त्यस्तै, चालु आर्थिक वर्ष २०८०/८१ को दोस्रो त्रैमाससम्ममा बैंकको खराब कर्जा अनुपात (एनपीएल)मा पनि सुधार आएको छ । गत आर्थिक वर्षमा ३.७० प्रतिशत रहेको बैंकको एनपीएल चालु आर्थिक वर्षको समीक्षा अवधिमा भने ३.४२ प्रतिशतमा झरेको छ ।
समीक्षा अवधिमा बैंकले इम्पेयरमेन्ट चार्ज २१ करोड १९ लाख रुपैयाँ छुट्याएको छ । गतवर्ष सोही अवधिमा बैंकले ३० करोड १५ लाख रुपैयाँ इम्पेयरमेन्ट चार्ज छुट्याएको थियो ।
त्यसैगरी बैंकले यसअवधिमा ३७ करोड रुपैयाँ सञ्चालन मुनाफा गरेको छ । जुन गत आर्थिक वर्षको तुलनामा ३२.२४ प्रतिशत बढी हो । गत आर्थिक वर्षमा बैंकको यस्तो मुनाफा २७ करोड ९८ लाख रुपैयाँ रहेको थियो । बैंकले सार्वजनिक गरेको विवरणअनुसार समीक्षा अवधिमा बैंकको निक्षेप संकलन र कर्जा प्रवाहमा पनि वृद्धि भएको छ । गत आर्थिक वर्षको तुलनामा यसवर्ष बैंकको निक्षेप संकलन ५.२८ प्रतिशतले बढेर ५६ अर्ब २९ करोड रुपैयाँ र कर्जा प्रवाह ०.३० प्रतिशतले बढेर ४३ अर्ब ९८ करोड रुपैयाँ पुगेको छ ।
समीक्षा अवधिमा बैंकको खुद नाफासँगै प्रतिसेयर आम्दानी (ईपीएस)मा पनि बढेको छ । यसअवधिमा बैंकको ईपीएस १२ रुपैयाँ ४७ पैसाबाट बढेर १५ रुपैयाँ ७८ पैसा कायम भएको छ । समीक्षा अवधिमा बैंकको वितरणयोग्य मुनाफा १७ करोड ४५ लाख रुपैयाँ रहेको छ भने चुक्तापुँजी ३ अर्ब २८ करोड रुपैयाँ रहेको छ । हाल बैंकको पीई रेसियो २२.३६ गुण रहेको छ भने प्रतिसेयर नेटवर्थ १५१ रुपैयाँ ६१ पैसा रहेको छ ।
