काठमाडौँ । बाँदर नियन्त्रणबारे अध्ययन गर्न सांसदहरुको जम्बो टोली भारत जाने भएको छ । प्रतिनिधि सभाको कृषि, सहकारी तथा प्राकृतिक स्रोत समितिका सदस्यहरु, १० जना पशु चिकित्सक र पाँच जना वनका रेन्जरसहितको टोली भारतको हिमांचल जाने भएका हुन् । समितिका एक सदस्यका अनुसार उक्त भ्रमणमा करिब १८/१९ जना सांसदहरु रहनेछन् ।
समिति सभापति डा.आरजु राणाको पहलमा भारतीय पक्षले नै आमन्त्रण गरेको र सोही आधारमा भ्रमण हुन लागेको बताइएको छ ।
तर, भ्रमणको मिति भने तय भएको छैन । यद्यपि भ्रमणका क्रममा सांसदहरुले बन्ध्याकरणमार्फत बाँदरको नियन्त्रणबारे अध्ययन गर्नेछन् । यो भ्रमण बाँदर आतंकका कारण आजित बनेका किसानहरुको लागि लाभदायक रहने सांसदहरुले विश्वास गरेका छन् ।
