काठमाडौँ । करिब ७ सयजना बिरामीको उपचार गरिसकेका नक्कली डाक्टर पक्राउ परेका छन् । काठमाडौँ उपत्यका अपराध अनुसन्धान कार्यालयले सोमबार पत्रकार सम्मेलन गर्दै विराटनगर–२ घर भई काठमाडौँ बाँसबारी बस्दै आएका ४० वर्षीय सम्बुद्ध भट्टचार्यलाई पक्राउ गरी सार्वजनिक गरेको हो ।
पक्राउ परेका सम्बुद्ध भट्टचार्यले चीनबाट एमबीबीएस गरेको र टिचिङ अस्पतालमा काम गर्ने भन्दै नक्कली कागजात बोकेर उपचार गर्दै आएको प्रहरीले जनाएको छ ।
प्रहरीका अनुसार उनले नेपाल मेडिकल काउन्सिलको नक्कली प्रमाणपत्र बनाएर डा.एस भट्टचार्यको नामबाट ठगिरहेको पाइएको छ । भट्टचार्यले विगत नौ महिनादेखि नक्सालस्थित वी केयर पोलिक्लिनिकमा ६३० जना बिरामीको जाँच तथा उपचार गरिसकेको काठमाडौँ उपत्यका अपराध अनुसन्धान कार्यालयका एसपी रवीन्द्र रेग्मीले जानकारी दिएका छन् ।
एसपी रेग्मीका अनुसार पक्राउ परेका भट्टचार्यले धौलागिरी हिमाल पोलिक्लिनिकमा ३० जना बिरामीको चेकजाँच गरेको पनि खुलेको छ ।
प्रहरीका अनुसार उनले विदेश जाने कामदारका लागि समेत नक्कली मेडिकल रिपोर्ट बनाउने गरेका थिए । प्रहरीले उनीमाथि इलाजसम्बन्धी र लिखतसम्बन्धी कसुरमा मुद्दा चलाउने तयारी गरेको छ ।
