काठमाडौँ । गोर्खा मिडिया नेटवर्क प्रालिको सेयर विवादमा फसेका राष्ट्रिय स्वतन्त्र पार्टी (रास्वपा)का अध्यक्ष रवि लामिछानेले पत्रकार सम्मेलन गर्ने भएका छन् । प्रतिनिधि सभा सदस्य समेत रहेका लामिछानेले सोमबार ४ः३० बजे पत्रकार सम्मेलन गर्ने जानकारी दिएका हुन् । उनले सोही पत्रकार सम्मेलनमार्फत आफ्ना विषयमा उठेका प्रश्नहरुको जवाफ दिने जनाएका छन् ।

उनले आफ्नो आधिकारिक फेसबुक पेजमार्फत जानकारी दिँदै सोमबार दिउँसो ४ः३० बजे पत्रकार सम्मेलन गर्ने जनाएका हुन् । सेयर लिँदा सहकारीको रकम दुरुपयोग गरेको उनीमाथि आरोप छ ।

‘सम्पूर्ण गाली गलोजहरु सुरक्षित राख्नु होला । कुनै दिन मन लागे पछुताउन काम लाग्न सक्छ । पार्टी कार्यालयमा आज ४ः३० बजे पत्रकार सम्मेलनमा प्रश्नसहित आउनुहोला ।’, उनले लेखेका छन् ।

ग्यालेक्सी टेलिभिजन छाड्दा लामिछानेको निजी खातामा १ करोड ८० लाख जम्मा भएको समाचार सार्वजनिक भएपछि लामिछाने चर्चामा छन् । लामिछानेले भने गोर्खा मिडियामा आफू स्वेट सेयर वा गुडविल सेयर लिएर गएको र कुनै आर्थिक कारोबार नगरेको बताउँदै आएका छन् ।