काठमाडौँ । रिलायन्स स्पिनिङ मिल्सले बुक बिल्डिङ विधिबाट प्राथामिक सेयर (आईपीओ) जारी गरेको छ । कम्पनीले माघ १० गते (बुधबार)देखि संस्थागत लगानीकर्ताका लागि आईपीओ जारी गरेको हो ।
कम्पनीले जारी पुँजी १ अर्ब ९० करोडको १० प्रतिशत अर्थात १९ करोड २६ लाख ६० हजार रुपैयाँ बराबरको प्रतिकित्ता १०० रुपैयाँ अंकित मूल्यमा १९ लाख २६ हजार ६ सय कित्ता सेयर निष्कासनको अनुमति पाएको थियो । जसमध्ये कम्पनीले पहिलो चरणमा ४० प्रतिशत अर्थात ७ लाख ७० हजार ६ सय ४० कित्ता सेयर निष्कासन गरेको छ । बाँकी ६० प्रतिशत अर्थात ११ लाख ५५ हजार ९ सय ६० कित्ता सेयर पछि सर्वसाधारणका लागि जारी हुनेछ ।
पहिलो चरणमा जारी गरिएको सेयरमा योग्य संस्थागत लगानीकर्ताले न्यूनतम मूल्य प्रतिकित्ता ६०८ रुपैयाँदेखि अधिकतम ९१२ रुपैयाँसम्मका लागि माघ १४ गतेसम्म नेपाल स्टक एक्सचेञ्जमा बोलकबोल गर्न सक्नेछन् ।
कम्पनीको धितोपत्र निष्कासन तथा बिक्री प्रबन्धक ग्लोबल आइएमई क्यापिटल रहेको छ । बुक बिल्डिङ विधिबाट सेयर निष्कासनका लागि कम्पनीले गराएको रेटिङमा केयर रेटिङ नेपालले कम्पनीलाई एनपी सिंगल ए माइनस इस्यूअर रेटिङ प्रदान गरेको छ । यसले कम्पनीको वित्तीय दायित्व बहन गर्न प्रयाप्त क्षमता रहेको बुझिन्छ ।
