काठमाडौँ । मुगुकी सगुना परियारले एक वर्षभित्रै लोकसेवाका ७ परीक्षा पास गरेकी छिन् । मुगुको छायाँनाथ रारा नगरपालिका–१, छत्यालवाडा गाउँकी २५ वर्षीया सगुनाले एक वर्षमा लोकसेवाले लिएका ७ परीक्षा पास गरेकी हुन् ।

उनले लोकसेवा आयोगले लिएको लुम्बिनी प्रदेश निजामती सेवातर्फ अनमी, स्थानीय सेवातर्फ अनमी, कर्णाली प्रदेश अनमी र पब्लिक हेल्थतर्फ नर्सिङ, कोशी प्रदेश अनमी, संघीय लोकसेवा आयोग दिपायलबाट स्टाफ नर्स र निजामती कर्मचारी अस्पतालमा नाम निकालेकी हुन् ।

आफ्नै गाउँ नजिकै रहेको सामुदायिक विद्यालयबाट एसएलसी पास गरी सेती महाकाली नर्सिङ क्याम्पसबाट २०७५ सालमा नर्सिङ पास गरेकी सगुनाले स्वास्थ्य सेवा कार्यालय मुगुमा दुई वर्ष करारमा काम गरेकी थिइन् ।

एकै वर्षमा लोकसेवाको सात परीक्षा पास गरेकी सगुना हाल दैलेखको दुल्लु नगरपालिकामा पब्लिक हेल्थ नर्सका रुपमा कार्यरत छिन् । मिहेनत गरे नेपालमै पनि अथाह अवसर छन् भन्ने प्रमाणित गरेकी सगुनाले सबैलाई निरन्तर मेहेनत गर्न र एकदुई पटकको असफलताबाट हार खानु हुँदैन भन्ने सन्देश पनि दिएकी छिन् ।