काठमाडौँ । सर्वोत्तम सिमेन्टले सर्वसाधारणका लागि प्राथामिक सेयर (आईपीओ) जारी गर्ने भएको छ । कम्पनीले पुष २५ गतेदेखि पहिलो पटक बुक बिल्डिङ विधिबाट आईपीओ जारी गर्न लागेको हो । पहिलो चरणमा कम्पनीले प्रभावित स्थानीय र वैदेशिक रोजगारीमा रहेका नेपालीहरुका लागि आईपीओ जारी गर्न लागेको कम्पनीले जनाएको छ ।
कम्पनीका अनुसार पुष २५ गतेदेखि बिक्री खुला गर्ने आईपीओमा उद्योग रहेको क्षेत्रका स्थानीय, खानी रहेका क्षेत्रका प्रभावित र वैदेशिक रोजगारीमा रहेकाहरुले आवेदन दिन सक्नेछन् ।
उक्त आईपीओमा लगानीकर्ताले छिटोमा माघ १० गतेसम्म आवेदन दिन सक्नेछन् । आवेदन दिँदा न्यूनतम ५० र अधिकतम १० हजार कित्तासम्मका लागि प्रतिकित्ता ३ सय ६० रुपैयाँ ९० पैसाका दरले आवेदन दिनुपर्नेछ ।
कम्पनीले पहिलो चरणमा उद्योग प्रभावित क्षेत्रका लागि ९ लाख ३० हजार कित्ता सेयर र वैदेशिक रोजगारीमा रहेकाहरुका लागि २ लाख ६७ हजार कित्ता सेयर बाँडफाँड हुनेछ । कम्पनीको सेयर निष्कासन तथा बिक्री प्रबन्धक ग्लोबल आइएमई क्यापिटल रहेको छ भने सह निष्काशन तथा बिक्री प्रबन्धक एनआइएमबी एस क्यापिटल र प्रभु क्यापिटल लिमिटेड रहेको छ ।
