काठमाडौँ । चालु आर्थिक वर्षको दोस्रो त्रैमासमा नेपाल एसबिआई बैंकको नाफा घटेको छ । बैंकले सार्वजनिक गरेको चालु आर्थिक वर्षको दोस्रो त्रैमाससम्मको अपरिष्कृत वित्तीय विवरण अनुसार बैंकको खुद नाफा २८.६० प्रतिशतले घटेको हो । यस अवधिमा बैंकले ८४ करोड ५ लाख ४१ हजार रुपैयाँ खुद नाफा आर्जन गरेको छ । जबकी बैंकले गत आर्थिक वर्षको सोही अवधिमा १ अर्ब १७ करोड ७१ लाख ९४ हजार रुपैयाँ खुद नाफा आर्जन गरेको थियो ।
समीक्षा अवधिमा नाफासँगै बैंकको प्रतिसेयर आम्दानी (ईपीएस) पनि घटेको छ । यसअवधिमा बैंकको ईपीएस ६ रुपैयाँ ७५ पैसाले घटेर १६ रुपैयाँ ५१ पैसामा सिमित भएको छ ।
बैंकले सार्वजनिक गरेको विवरणअनुसार समीक्षा अवधिमा बैंकको खराब कर्जा १.८२ प्रतिशतले बढेर २.२९ प्रतिशत पुगेको छ । यस अवधिमा बैंकको खुद ब्याज आम्दानी ०.५६ प्रतिशतले घटेर २ अर्ब ६५ करोड ८५ लाख ४२ हजार रुपैयाँ कायम भएको छ ।
यस अवधिमा बैंकको सञ्चालन नाफा पनि २८.९१ प्रतिशतले घटेर १ अर्ब १८ करोड ३९ लाख ६९ हजार रुपैयाँमा सिमित भएको छ । चुक्ता पुँजी १० अर्ब १२ करोड ६ लाख २८ हजार रुपैयाँ रहेको बैंकको वितरणयोग्य मुनाफा भने ४९ करोड ५५ लाख ८७ हजार रुपैयाँ रहेको छ ।
