काठमाडौँ । सरकारले नेपाल धितोपत्र बोर्डको निमित्त अध्यक्षको जिम्मेवारी डा.नबराज अधिकारीलाई दिएको छ । आइतबार अर्थ मन्त्रालयले मन्त्रिस्तरीय निर्णय गर्दै बोर्डको वरिष्ठ कर्मचारीको हैसियतमा अधिकारीलाई निमित्त अध्यक्षको जिम्मेवारी दिएको हो ।

गत पुष २० गते बोर्डका तत्कालीन अध्यक्ष रमेशकुमार हमालको कार्यकाल सकिएपछि अहिले बोर्ड नेतृत्वविहीन छ । योसँगै अब बोर्डको नयाँ अध्यक्ष नियुक्त नहुदाँसम्म अधिकारीले बोर्डको नेतृत्व सम्हाल्नेछन् ।

यसो त बोर्डको अध्यक्ष नियुक्तिका लागि सरकारले राष्ट्रिय योजना आयोगका उपाध्यक्ष डा.मीनबहादुर श्रेष्ठको संयोजकत्वमा तीन सदस्यीय समिति गठन गरेको छ । अर्थ मन्त्रालयका सचिव डा.कृष्णहरि पुष्कर र व्यवस्थापनका प्राध्यापक उदय निरौला सदस्य रहेको उक्त समितिले बोर्डको अध्यक्ष कसलाई बनाउने ? भन्नेबारे नाम मन्त्रिपरिषद्मा सिफारिस गर्नेछ । सोही सिफारिसका आधारमा सरकारले एकजनालाई बोर्डको अध्यक्षमा नियुक्त गर्नेछ ।