काठमाडौँ । स्ट्याण्डर्ड चार्टर्ड बैंकले चालु आर्थिक वर्षको दोस्रो त्रैमाससम्मको अपरिष्कृत वित्तीय विवरण प्रकाशित गरेको छ । बैंकले प्रकाशित गरेको वित्तीय विवरणअनुसार चालु आर्थिक वर्षको दोस्रो त्रैमासमा बैंकले १ अर्ब ७२ करोड ६४ लाख रुपैयाँ खुद नाफा आर्जन गरेको छ । जुन गत आर्थिक वर्षको सोही अवधिको तुलनामा १.५५ प्रतिशत कम हो । गत आर्थिक वर्षको समीक्षा अवधिमा बैंकले १ अर्ब ७५ करोड रुपैयाँ खुद नाफा आर्जन गरेको थियो ।
त्यस्तै, समीक्षा अवधिमा बैंकको खुद ब्याज आम्दानी ७.५४ प्रतिशतले घटेको छ भने खुद फि तथा कमिसन आम्दानी १५.४० प्रतिशतले बढेको छ । त्यस्तै, बैंकको कुल सञ्चालन आम्दानी २.७७ प्रतिशत र सञ्चालन मुनाफा १.५० प्रतिशतले घटेको छ ।
समीक्षा अवधिमा बैंकको निष्क्रिय कर्जा ०.७२ प्रतिशतबाट बढेर १.६ प्रतिशत पुगेको छ । त्यस्तै, यसअवधिमा बैंकको वितरणयोग्य मुनाफा १ अर्ब ३१ करोड रुपौयँ रहेको छ भने प्रतिसेयर वितरणयोग्य मुनाफा २३ रुपैयाँ ९४ पैसा रहेको छ ।
बैंकले प्रकाशित गरेको वित्तीय विवरणअनुसार चालु आर्थिक वर्षैको दोस्रो त्रैमासमा बैंकको नाफासँगै प्रतिसेयर आम्दानी (ईपीएस) पनि घटेको छ । यस अवधिमा बैंकको यस्तो आम्दानी ५८ पैसाले घटेर ३६ रुपैयाँ ६२ पैसामा झरेको छ । त्यस्तै, यसअवधिमा बैंकको प्रतिसेयर नेटवर्थ २०५ रुपैयाँ ५८ पैसा रहेको छ ।
