काठमाडौँ । जिल्ला अदालत काठमाडौँले अध्यागमन कार्यालयका थप ७ जना अधिकृतविरुद्ध पक्राउ पुर्जी जारी गरेको छ । अध्यागमन कार्यालयमा संगठित रुपमै भिजिट भिसाको सेटिङ चलेको पुष्टी भएपछि प्रहरीको अनुसन्धानका आधारमा अदालतले थप ७ जना अध्यागमन अधिकृतविरुद्ध पक्राउ पुर्जी जारी गरेको हो ।
पक्राउ पुर्जी जारी हुनेहरुमा कुशल बराल, शैलेन्द्र ढकाल, विमल पौडेल, विष्णु अर्याल, विकास डंगोल, पीताम्बर रिमाल र सुजन फागो रहेका छन् । काठमाडौँ जिल्ला अदालतले उनीहरुविरुद्ध माघ ९ गते पक्राउ पुर्जी जारी गरेको हो ।
भिजिट भिसा प्रकरणमा यसअघि नै पक्राउ परेका अध्यागमन अधिकृत नरवीर खड्का र बिचौलियाहरुको बयानका आधारमा थप ७ जनाविरुद्ध पक्राउ पुर्जी जारी गरिएको प्रहरीले जनाएको छ ।
हाल प्रहरीले भिजिट भिसा प्रकरणमा पक्राउ परेकाहरुमाथि लिखत किर्ते तथा संगठित अपराधको कसुरमा १० जनालाई थुनामा राखेर अनुसन्धान गरिरहेको छ । पक्राउ पुर्जी जारी भइसकेको अध्यागमन कार्यालयका कर्मचारी र संलग्न थप अन्यको पनि खोजिकार्य भइरहेको प्रहरीले जनाएको छ ।
