काठमाडौँ । नेपाल स्टक एक्सचेञ्ज (नेप्से)को अनलाइन कारोबार प्रणालीमा अनाधिकृत प्रवेशबारे अर्थ मन्त्रालयले छानविन गर्न निर्देशन दिएको छ । नेप्सेको सिष्टममा वाइकोको अनाधिकृत प्रवेशबारे अर्थ सरोकारले समाचार सम्प्रेषण गरेपछि अर्थमन्त्रालयले नेप्सेको सिष्टममा अनाधिकृत प्रवेशबारे छानविन गर्न निर्देशन दिएको हो ।

अर्थ मन्त्रालयका एक अधिकारीका अनुसार अर्थमन्त्री डा.प्रकाशशरण महतको ठाडो निर्देशनमा नेप्सेको अनलाइन कारोबार प्रणाली (नट्स) मा वाइकोको अनाधिकृत प्रवेशबारे छानविन गर्न निर्देशन दिइएको हो ।

यसो त नेपाल धितोपत्र बोर्डले गरेको एक अध्ययनले नेप्सेमा वाईको कम्पनीसँग मिलेर सिमित स्वार्थ समूहले कम्पनीको सेयर भाउ बढाउने, मन परेका कम्पनीको भाउ घटाउने गरेको खुलासा गरेको थियो । बोर्डको उक्त अध्ययनले नेप्सेको आईटी विभागका कर्मचारी, केही ब्रोकर र ठूला लगानीकर्ताहरुको मिलेमतोमा चलखेल हुने गरेको र यस्तो चलखेलले सोझा लगानीकर्ता फसिरहेको पनि खुलासा गरेको थियो ।

तर, बोर्डले यस्तो गम्भीर खुलासा गर्दा पनि तालुकदार मन्त्रालय तथा निकायले भने उक्त विषय गम्भीर रुपमा लिएका थिएनन् । तर, हाथवे र हिमालयन रिको मूल्य उचाल्नेगरी नेप्सेको सिष्टमभित्र अनाधिकृत प्रवेश भएको र अनाधिकृत प्रवेश गरेकाहरुको तथ्यांक लगको क्याच फाइल डिलिट तयारीसहित नेप्सेको सिष्टम बन्द गरिएको भन्ने समाचार अर्थ सरोकारले सम्प्रेषण गरेपछि अर्थ मन्त्रालय तातेको छ ।

मन्त्रालय स्रोतका अनुसार अर्थमन्त्रिको निर्देशनअनुसार अब छिट्टै नेप्सेको सिष्टममा अनाधिकृ प्रवेशबारे छानविनका लागि समिति गठन हुनेछ र उक्त समितिले नेप्सेको सिष्टममा वाईकोको अनाधिकृत प्रवेशबारे थप अध्ययन गर्नेछ ।