काठमाडौँ । सर्वोत्तम सिमेन्टले सर्वसाधारणका लागि प्राथमिक सेयर (आईपीओ) बिक्री खुला गरेको छ । कम्पनीले फागुन १३ गते (आइतबार)देखि सर्वसाधारणका लागि बुक बिल्डिङ विधिमार्फत आईपीओ जारी गरेको हो ।
कम्पनीले सर्वसाधारणका लागि जारी पुँजीको १२.९० प्रतिशतले हुन आउने ६० करोड रुपैयाँको सेयर जारी गरेको हो । कम्पनीले यसअघि प्रभावित क्षेत्रका स्थानीय बासिन्दाका लागि जारी गरेको आईपीओमा आवदेन नपरेको ६ लाख ८१ हजार ५३० कित्तासहित कुल २७ लाख ७६ हजार ७६ कित्ता सेयर निष्कासन गरेको हो ।
कम्पनीले जारी गरेको आईपीओमा लगानीकर्ताले प्रतिकित्ता ३६० रुपैयाँ ९० पैसाका दरले आवेदन दिनुपर्नेछ । यसमा लगानीकर्ताले न्यूनतम ५० कित्तादेखि अधिकतम १० हजार कित्तासम्मका लागि आवेदन दिनुपर्नेछ । कम्पनीको आईपीओमा छिटोमा फागुन १६ गते र ढिलोमा फागुन २७ गतेसम्म आवेदन दिन सकिनेछ ।
सर्वोत्तम सिमेन्टले आईपीओ निष्कासनका लागि इक्रा नेपालले ‘इक्राएनपी इन्यूअर रेटिङ ट्रिपल बी’ प्रदान गरेको छ । यसले कम्पनीको वित्तीय दायित्व बहन गर्न सक्ने क्षमता मध्यम रहेको देखाउँछ ।
