काठमाडौँ । मेरो माइक्रोफाइनान्स लघुवित्त वित्तीय संस्था लिमिटेडको नाफा घटेको छ । कम्पनीले सार्वजनिक गरेको चालु आर्थिक वर्षको दोस्रो त्रैमाससम्मको अपरिस्कृत वित्तीय विवरणअनुसार गत आर्थिक वर्षको तुलनामा कम्पनीको खुद नाफा ५.१४ प्रतिशतले घटेको हो ।
यसअवधिमा कम्पनीले कुल ६ करोड ४३ लाख रुपैयाँ खुद नाफा आर्जन गरेको थियो । जबकी गत आर्थिक वर्षको सोही अवधिमा कम्पनीले ७ करोड ७७ लाख रुपैयाँ खुद नाफा कमाएको थियो ।
चालु आर्थिक वर्षको पुष मसान्तसम्ममा कम्पनीको खुद नाफा घट्नुको प्रमुख कारण कम्पनीको निष्क्रिय कर्जामा देखिएको बढोत्तरी हो । समीक्षा अवधिमा कम्पनीको निष्क्रिय कर्जा ४.९६ प्रतिशतबाट बढेर ७.८७ प्रतिशत पुगेको छ । योसँगै कम्पनीको इम्पेयरमेन्ट चार्ज पनि ४ करोड ५४ लाख रुपैयाँबाट बढेर ५ करोड २ लाख रुपैयाँ पुगेको छ ।
कम्पनीले सार्वजनिक गरेको वित्तीय विवरणअनुसार यस अवधिमा लघुवित्तको खुद ब्याज आम्दानी १.१७ प्रतिशत र खुद फि तथा कमिसन आम्दानी ११.०८ प्रतिशतले बढेको छ । त्यस्तै, समीक्षा अवधिमा लघुवित्तको खुद सञ्चालन आम्दानी २.३९ प्रतिशत बढेको छ भने सञ्चालन मुनाफा ३.१५ प्रतिशतले घटेको छ । यस अवधिमा कम्पनीको प्रतिसेयर आम्दानी ९ रुपैयाँ ७४ पैसा रहेको छ भने कम्पनीको प्रतिसेयर नेटवर्थ १४९.२२ गुणा रहेको छ ।
