काठमाडौं। डर, त्रास तथा धम्की दिई ५० लाख रुपैयाँ माग्ने दुई जना पक्राउ परेका छन् । पक्राउ पर्नेमा कैलाली टीकापुर नगरपालिका-१ बस्ने ३६ बर्षीय हृदयराज बोगटी उपनाम विश्वजित बटला तथा नुवाकोट ककनी नगरपालिका-३ बस्ने ३६ बर्षीय नरहरि ढुङगाना उपनाम रमेश रहेका छन् ।
उनीहरुलाई काठमाडौं उपत्यका अपराध अनुसन्धान कार्यलयबाट खटिएको प्रहरी टोलीले गोप्य सूचनाका आधारमा फागुन ६ गते चन्द्रगिरि नगरपालिका-९ मच्छेगाउँबाट पक्राउ गरेको हो ।
उनीहरुले योजनाबद्ध तरिकाले पीडितलाई पटक-पटक फोनमार्फत तथा प्रत्यक्ष भेट गरी धम्की तथा त्रास देखाई ५० लाख मागेको प्रहरीले जनाएको छ । प्रहरीले उनीहरुको साथबाट मोटरसाइकल (सु.प.प्र.-०१००९ प ६६१०) एक थान, विभिन्न कम्पनीका मोबाइलहरु चार थान तथा नेपाल कम्युनिष्ट पार्टी (माओवादी) को सहयोग रसिद एक ठेली बरामद गरेको छ ।
पक्राउ परेका उनीहरुलाई आपराधिक लाभ मुद्दामा थप अनुसन्धान तथा कारबाहीका लागि जिल्ला प्रहरी परिसर काठमाडौं पठाईएको प्रहरीले जनाएको छ ।
