काठमाडौँ । गृह मन्त्रालयले व्यवसायी दुर्गा प्रसाईंको हतियारबारे छानविन गर्ने भएको छ । प्रसाईंले लाइसेन्स लिएर राखेको स्वचालित हतियारबारे गृहले छानविन गर्ने भएको हो । यसका लागि गृह मन्त्रालयले मन्त्रीस्तरीय निर्णयबाट छानविन समिति बनाएको छ ।
गृह मन्त्रालयले बनाएको समितिमा गृहका सहसचिव राजेन्द्रदेव पाण्डे संयोजक छन् । उक्त समितिमा गृह मन्त्रालयका कानुन शाखाका उपसचिव ऋषि पौडेल, एसपी सन्तोष भट्टराई र गृह मन्त्रालयका उपसचिव एकदेव अधिकारी सदस्य रहेका छन् ।
गृहले बनाएको छानविन समितिले चैत ५ गते सर्वोच्च अदालत परिसरबाट पक्राउ परेका प्रसाईंका बडिगार्डबाट बरामद गरेको स्वचालित हतियारकाबारेमा छानविन गर्नेछ ।
पक्राउ परेका प्रसाईंका बडिगार्डद्वय दीपक खड्का र रामकुमार धिमालले दायर गरेको बन्दी प्रत्यक्षीकरणको रिटमाथि सुनुवाई गर्दै अदालतले उनीहरुलाई थुनामुक्त गर्न र लाइसेन्स लिएरसमेत राख्न नमिल्ने स्वचालित हतियारको लाइसेन्स प्रसाईंले कसरी पाए ? भन्ने बारेमा छानविन गर्न आदेश दिएको थियो । सोही आदेश अनुसार गृहले छानविन समिति बनाएको हो । उक्त समितिले छानविन सुरु गरेको १५ दिनभित्र प्रतिवेदन पेश गुर्नपर्नेछ ।
