काठमाडौँ । दक्षिण कोरियाले अब वन र सेवा क्षेत्रमा पनि कामदार लैजाने भएको छ । कोरियाले सन् २०२४ देखि रोजगार अनुमति प्रणाली (ईपीएस) मार्फत वन, सेवा र रुट इन्डष्ट्रि क्षेत्रमा पनि कामदार लैजाने भएको हो । यी थप ३ क्षेत्रमा नेपालबाट कामदार लैजानेबारे कोरियाली सरकारले औपचारिक रुपमा जानकारी गराइसकेको छ ।

हाल कोरियाली सरकारले नेपालबाट कृषि, उत्पादनमुलक र जहाज निर्माण (सिप बिल्डिङ)मा कामदार लगिरहे पनि अब थप ३ क्षेत्रमा पनि कामदार लैजाने वैदेशिक रोजगार विभागले जनाएको छ ।

कोरियाले हाल थप गरेका यी ३ क्षेत्र (वन क्षेत्र, सेवा क्षेत्र र रुट इन्डष्ट्रि क्षेत्र)मा भाषा परीक्षा पास भएका र फर्किएर आएपछि कोरिया जान फेरि परीक्षा पास गरेकाहरुलाई अवसर दिनेछ । कृषितर्फ भाषा परीक्षा पास भएकालाई वनतर्फ र अन्यलाई सेवा तथा रुट इन्डस्ट्रीतर्फ पनि लैजान सकिने जानकारी आएको विभागले जनाएको छ ।

विभागका अनुसार यो वर्षभन्दा अर्को वर्ष १३.२ प्रतिशत बढी कोटा दिएर श्रमिक लैजाने भएको छ ।