काठमाडौं । युके पठाईदिन्छु भन्दै रकम ठगी गर्ने महिला पक्राउ परेकी छिन् । पक्राउ पर्नेमा मोरङ जिल्ला उर्लाबारी नगरपालिका वडा नं. ०९ घर भई हाल ललितपुर महानगरपालिका वडा नं. २५ भैसेपाटी बस्ने ३४ वर्षीय लक्ष्मी लिम्बु रहेकी छिन्।

उनले रविन सैजु सहित ४ जनालाई वैदेशिक रोजगारीको लागि युके पठाईदिने र युके पुगेपछि प्रतिष्ठित कम्पनीमा काम लगाईदिन्छु, मासिक चार लाख २० हजार रुपैयाँ तलब हुन्छ भन्दै प्रलोभनमा पारेर २९ लाख ८८ हजार ठगी गरेकी हुन् । उनले युके जान प्रतिव्यक्ति २३ लाख लाग्ने बताएकी थिइन् ।

उनलाई काठमाडौं उपत्यका अपराध अनुसन्धान कार्यलयबाट खटिएको प्रहरी टोलीले फागुन २३ गते भैसेपाटीबाट पक्राउ गरेको हो ।