">
काठमाडौँ । महिला, बालबालिका तथा ज्येष्ठ नागरिक मन्त्री भगवती चौधरीले परिणाम देखिनेगरी अर्थपूर्ण काम गर्न कर्मचारीलाई निर्देशन दिएकी छिन् । बिहीबार मन्त्रालयमा उनले नीतिगत निर्णय गर्दै २ महिनामा रिजल्ट ल्याउने गरी काम गर्न कर्मचारीलाई निर्देशन दिएकी हुन् ।
मन्त्री चौधरीले अर्थपूर्ण रूपमा काम गर्न कम्पोजिसन मिल्नुपर्ने बताएकी छिन् । उनले भनिन्, ‘जनगुनासो चासो अनुसार मन्त्रालयको लक्षित क्षेत्रअनुसार काम गर्नुस् । परिणाम देखाउने गरी काम गर्नुपर्यो । भए गरेका काम कारबाहीका विषयमा समीक्षा पनि गर्नुस् ।’
उनले पछिल्ला दुई महिनामा भए गरेका महत्त्वपूर्ण कामको समीक्षा गरी रिपोर्ट तयार गर्न समेत कर्मचारीलाई निर्देशन दिएकी छिन् ।
सरकारले अन्तर्राष्ट्रिय सन्धि सम्झौता गरिसकेपछि त्यसको पालना गर्नुपर्ने भन्दै मन्त्री चौधरीले त्यसप्रति राज्य जिम्मेवार रहनुपर्ने बताएकी छिन् । सेवाग्राहीले मन्त्रालय छ भन्ने महसुस हुनेगरि काम गर्नुपर्ने भन्दै उनले सीमित स्रोत साधनका कारण समस्या उत्पन्न भएको उल्लेख गरेकी छिन् । त्यसका बाबजुद पनि बढी भन्दा बढी सेवाग्राही लाभ हुनेगरि काम गर्नुपर्ने उनी बताउँछिन् ।
मन्त्रालयसँग सम्बन्धित विषयमा संसद्मा उठेका प्रश्नहरूको पनि सम्बोधन गर्न सम्बन्धित शाखाबीच समन्वय गर्न मन्त्री चौधरीले निर्देशन दिएकी छिन् ।
