काठमाडौँ । अवैध रूपमा चाइनिज मुद्रा नेपाल भित्र्याइ भन्सार तथा राजस्व छली गरेको आरोपमा प्रहरीले दुई जना व्यक्तिलाई पक्राउ गरेको छ । पक्राउ पर्नेमा ४५ वर्षीय चिनियाँ नागरिक याओ लियाङ्ग्लिन र भक्तपुर स्थायी घर भएका ३७ वर्षीय दीपेन्द्र श्रेष्ठ रहेका छन् ।
नेपाल प्रहरी प्रधान कार्यालय केन्द्रीय अनुसन्धान ब्युरोका प्रवक्ता प्रहरी उपरीक्षक होविन्द्र बोगटीका अनुसार चिनियाँ नागरिकलाई काठमाडौँ महानगरपालिका वडा नम्बर १७ क्षेत्रपाटीमा रहेको जियाङ सु होटल एण्ड रेस्टुरेन्टबाट र श्रेष्ठलाई काठमाडौँको ठमेलस्थित होटल चेङ्दु प्रालिबाट पक्राउ गरिएको हो ।
प्रहरीले पक्राउ परेका चिनियाँ नागरिकको साथबाट नेपाली रुपियाँ ३७ लाख ८१ हजार ३ सय ५०, भारतीय १२ हजार, थाइ भाट २ हजार, अमेरिकी डलर ५ सय ३०, युरो ३ सय, चाइनिज युआन ३२ हजार ७०, मोबाइल दुई थान, राहदानी एक थान, स्थायी परिचयपत्र एक थान, एटिएम कार्ड लगायतका सामाग्री बरामद गरेको छ ।
त्यस्तै, श्रेष्ठको साथबाट प्रहरीले नेपाली रुपियाँ ९ लाख बरामद गरेको छ । पक्राउ परेका व्यक्तिहरूलाई थप अनुसन्धान तथा कारबाहीका लागि राजस्व अनुसन्धान विभाग हरिहर भवन ललितपुर पठाइएको प्रहरीले जनाएको छ ।
