काठमाडौं। राष्ट्रिय सहकारी महासङ्घले दक्ष युवा मानवशक्ति आकर्षण गर्दै सहकारी मार्फत बेरोजगारी न्यूनिकरणमा योगदान दिने उद्देश्यले सहकारी रोजगार मेला आयोजना गर्ने भएको छ । महासङ्घको आइतबार बसेको बोर्ड बैठकले २०८१ असार ७ गते देखि ९ गतेसम्म महासंघ परिसरभित्र पहिलो सहकारी रोजगार मेला आयोजना गर्ने निर्णय गरेको हो ।

महासङ्घका अध्यक्ष ओमदेवी मल्लको अध्यक्षतामा आइतबार भर्चुअल रुपमा बसेको बोर्ड बैठकले नेपाल सरकार, केन्द्रीय सहकारी सङ्घहरू, राष्ट्रिय सहकारी बैंकलगायत अन्य सहकारी संघ/संस्था तथा निकायहरूसँगको सहयोग र समन्वयमा मेला आयोजना गर्ने निर्णय गरेको छ ।

साथै, बैठकले सहकारी अभियानको मर्यादाक्रमको सूची स्वीकृत गरेको छ । नेपालको सहकारी अभियानका कार्यक्रमलाई मर्यादित, व्यवस्थित र बदररहित बनाउन सहकारी अभियानको मयार्दाक्रम सूची तयार भएको महासङ्घका अध्यक्ष मल्लले बताए । 

साथै महासङ्घले सहकारी क्षेत्रमा आइपर्ने समस्या एवं चुनौतीहरू समाधानमा समन्वय तथा सुझाव लिन विज्ञ समूह गठन गर्ने भएको छ । आइतबारको बैठकले विज्ञ समूह निर्माण तथा सञ्चालन विधि समेत पास गरेको छ । विभिन्न क्षेत्रका विज्ञहरूलाई समेटेर छिट्टै विज्ञ समूह गठन गरिने अध्यक्ष मल्लले बताएका छन् ।

 बैठकले महासङ्घको आगामी आर्थिक वर्ष २०८१/०८२ को वार्षिक कार्यक्रम तथा बजेट तर्जुमा गर्न वरिष्ठ उपाध्यक्ष रमेश पोखरेलको संयोजकत्वमा कार्यक्रम तथा बजेट मस्यौदा उपसमिति गठन गरेको छ । सो समितिको सदस्यहरूमा महासङ्घका उपाध्यक्ष खेम बहादुर पाठक र उपाध्यक्ष डिबी बस्नेत छन् । साथै युवा समन्वय उपसमितिको संयोजकमा सञ्चालक सुमन नेपाललाई जिम्मेवारी दिने निर्णय समेत गरेको छ ।