">
काठमाडौँ । सुनसरीको बराहक्षेत्र नगरपालिका-५ मा घुँगीको व्यापार गर्दै गर्दा भेटिएका रिता मुखिया घुँगीको व्यापारबाट राम्रै आम्दानी गरिरहेका छन् ।
उनले सुनसरीको झुम्का, बराहक्षेत्र, कालाबन्जर लगायतका हतियामा घुँगीको व्यापार गर्दै आएका छन् । मुखियाले आफैले खोलाबाट घुँगी खोजेर ल्याई हतिया बजारमा व्यापार गर्दै आएको बताए । मेहनत अनुसारको राम्रै आम्दानीसँगै सहज पनि भएको उनको भनाई छ ।
ृउनले विगत एक वर्षदेखि हटिया बजारमा घुँगीको व्यापार गर्दै आएका छन् । उनका लागि भने अहिले सुनसरीका झुम्का, कालाबन्जरका हटियाबजार भने घुँगीको व्यापार गर्ने थलो नै बनेका छन् । उनले घुँगी जतात्यतै नपाउने भएकाले खोलाबाट खोजेर घरमा ल्याएपछि परिवारसहित मिलेर घुँगीलाई पखालेर सफा बनाएपछि स्थानीय हाटबजारमा बिक्री गर्नेे गरेको बताए ।
घुँगीको व्यापारबाट उनले मासिक रु २५ देखि ३० हजारसम्म आम्दानी हुँदै आएको जानकारी दिएका छन् । आफूले खोलाबाट खोजेर ल्याई बिक्री गर्दै आएको घुँगी किन्न भने बराह क्षेत्र नगरपालिकालगायत झुम्का कालाबन्जरका ठाउँबाट किन्न आउने ग्राहकको घुइँचो नै लाग्ने गरेको उनी सुनाउँछन् ।
उनले घुँगी प्रतिकिलो रु एक सयमा बिक्री गर्दै आएका छन् । उनले दैनिक रुपमा १२ देखि १५ किलोसम्म बिक्री गर्दै आएका छन् । उनले यहीँबाट परिवारका लागि खर्चसमेत जुटाउँदै आएको बताए । ‘घुँगीमा भिटामिन पाइने हुनाले रुघा र चिसो लागेको बेला यसलाई सफा पानीले धोएर पकाएर रस पिउँदा स्वादिलो हुनका साथ रुघा र चिसो पनि ठिक हुने भएकाले धेरैजसो मानिसले घुँगी खाने गरेका छन् ।’, उनले भने ।
गर्मी महिनाभन्दा जाडोमा घुँगीको व्यापार राम्रो हुने गरेको मुखियाले बताए । जाडो महिनामा घुँगी बाहिर निस्किने भएकाले पुसको सुरुवातदेखि माघ–फागुनसम्म राम्रो व्यापार हुने गरेको उनको भनाई छ ।
