">
काठमाडौं। हिमालयन लाइफ इन्स्योरेन्स लिमिटेडले १६ औं वार्षिकोत्सवको अवसरमा आइतबार सातै प्रदेशमा विविध कार्यक्रम सम्पन्न गरेको छ । सो अवसरमा कम्पनीले विभिन्न आश्रम तथा विद्यालयका विद्यार्थीहरूलाई खाद्यान्न र स्टेसनरी सामाग्री वितरण गरेको छ ।
कम्पनीले कोशी प्रदेश अन्तर्गत विराटनगरमा पूर्वाञ्चल बाल सेवा आश्रमलाई स्टेसनरी तथा विराटेश्वर वृद्धाश्रम निर्माण सामाग्री, बिर्तामोड स्थित नमस्ते बाल तथा वृद्धा आश्रमका बालबालिकाहरूलाई शैक्षिक सामाग्री र वृद्धवृद्धाहरूको लागि खाद्यान्न वितरण गरेको छ । त्यस्तै, कम्पनीले मधेश प्रदेश अन्तर्गत जनकपुर स्थित राम जानकी वृद्धाश्रम, बर्दिबास स्थित भुवनेश्वरी वृद्धाश्रम र वीरगञ्ज स्थित मानव सेवा आश्रममा खाना खुवाउने कार्यक्रम सम्पन्न गरेको छ ।
त्यसैगरी, बागमती प्रदेश अन्तर्गत अपाङ्ग पुनर्स्थापना केन्द्र गोकर्णमा खाद्यान्न वितरण, चितवन देवघाट स्थित रामजानकी आश्रममा शैक्षिक सामाग्री वितरण गरिएको छ भने गण्डकी प्रदेश अन्तर्गत बाग्लुङको मानव सेवा आश्रममा खाना खुवाउने, लमजुङ बेँसीसहर स्थित लमजुङ विद्यालयका ४० जना विद्यार्थीहरूलाई स्टेसनरी वितरण, पोखरा स्थित वल्डएज होममा खाद्यान्न वितरण गरेको छ ।
लुम्बिनी प्रदेश अन्तर्गत बुटवल स्थित अपाङ्ग आश्रममा खाद्यान्न वितरण, नेपालगञ्ज, पाल्पा र घोराही स्थित निलसागर सेवा आश्रमका वृद्धवृद्धालाई खाद्यान्न वितरण, कपिलवस्तु स्थित कैलाश आश्रममा खाना खुवाउने कार्यक्रम सम्पन्न गरेको छ भने कर्णाली प्रदेशको सुर्खेत स्थित मानव सेवा आश्रममा खाना खुवाउने कार्यक्रम सम्पन्न भएको छ ।
त्यस्तै सुदूरपश्चिम प्रदेश अन्तर्गत टीकापुर स्थित सहारा घर, डडेल्धुरा स्थित उग्रतारा संस्कृत विद्यालय, झलारी स्थित विद्यालयमा र धनगढी स्थित परिवार बालगृहमा खाद्यान्न तथा विद्यार्थीहरूलाई स्टेसनरी सामग्री वितरण गरिएको छ ।
हिमालयन लाइफ इन्स्योरेन्स स्थापना भएको १६ वर्ष पुरा भएको छ । साविकको प्राइम लाइफ, गुराँस लाइफ र युनियन लाइफ इन्स्योरेन्स कम्पनी लिमिटेड मर्जर भई हिमालयन लाइफ इन्स्योरेन्स बनेको हो ।
