काठमाडौँ । ५९ उद्योगले आफ्नो उद्योगको लाइन आफैँ काटेका छन् । नेपाल विद्युत प्राधिकरण र उद्योगीबीचको डेडिकेटेड तथा ट्रंक लाइन विवादमा प्राधिकरणले बक्यौता नतिर्ने उद्योगको धमाधम लाइन काट्न थालेपछी आत्तिएर अन्य ५९ उद्योगीले आफ्नो उद्योगको लाइन आफैँ काटेका हुन् । 

यद्यपि उद्योगीहरुले यसअघि प्राधिकरणले २५ र २६ गते लाइन काटेका उद्योगमा लाइन नजोडेपछि सबै उद्योगले विरोधस्वरुप आफैँ लाइन काटेको बताएका छन् । 

आइतबार विज्ञप्ति नै जारी गरेर उद्योगीहरुले सबै उद्योगको लाइन स्वतःस्फूर्त रुपमा काटेको जानकारी गराएका छन् । उनीहरुले विद्युत महसुल विवादमा प्राधिकरणले उद्योगको लाइन काटेर, लाइन नजोडेर उद्योगीलाई तर्साउने काम गरेको आरोप लगाएका छन् । 

तर, प्राधिकरणले लाल आयोगको सिफारिसका आधारमा मन्त्रिपरिषद्ले गरेको निर्णय अनुसार नै २०७२ माघदेखि २०७५ बैशाखसम्म डेडिकेटेड तथा ट्रंक लाइन प्रयोग गरेबापतको बक्यौता र २५ प्रतिशत जरिवाना तिर्न पटकपटक आग्रह गर्दा पनि उद्योगले अटेर गरेपछि लाइन काटेको बताउँदै आएको छ । 

यता उद्योगीहरुले भने प्राधिकरणले तिर्नुनपर्ने बक्यौता देखाएर अनावश्यक बखेडा झिकेको भन्दै प्रमाणसहित बिल जारी गरे महसुल तिर्ने र विवाद समाधान नभएसम्म कुनै पनि उद्योगले लाइन नजोड्ने बताएका छन् । यसअघि प्राधिकरणले २५ र २६ गते बक्यौता तिर्न अटेर गरेको भन्दै रिलायन्स स्पिनिङ मिल्स, अर्घाखाँची सिमेन्ट, जगदम्बा सिन्थेटिक, हुलास स्टिल लगायको बिजुली लाइन काटेको थियो ।