काठमाडौँ । भारतका प्रधानमन्त्री नरेन्द्र मोदीले सिंगापुरमा ‘इन्भेस्ट इन्डिया अफिस’ स्थापना गर्ने घोषणा गरेका छन् । जसले सिंगापुरका लगानीकर्ताहरूलाई भारतका विभिन्न क्षेत्रमा लगानी गर्न सहयोग पुर्याउने विश्वास गरिएको छ । यो घोषणा प्रधानमन्त्री मोदीको दुईदिने सिंगापुर भ्रमणको क्रममा भएको हो ।
भारतका विदेश मन्त्रालयका पूर्वी सचिव, जयदीप माजुमदारका अनुसार यो उपयुक्त समय हो, किनभने भारतमा तीव्र रूपमा नयाँ अवसरहरू खुल्दै छन् । यसका साथै, सिंगापुरका प्रमुख कम्पनीहरूका सीईओहरूसँग प्रधानमन्त्री मोदीले विभिन्न आर्थिक र रणनीतिक विषयमा छलफल गरेका छन् ।
भ्रमणको क्रममा चार समझदारीपत्रहरू (एमओयू) साटासाट गरिएका छन् । जसमा सेमिकन्डक्टर क्षेत्र, डिजिटल प्रविधि, सीप विकास र स्वास्थ्य सेवा समावेश छन्। दुबै देशले आफ्नो सम्बन्धलाई व्यापक रणनीतिक साझेदारीको रूपमा उचाइमा पुर्याउने निर्णय गरेका छन् ।
प्रधानमन्त्री मोदीले सिंगापुरमा थिरुवल्लुवर सांस्कृतिक केन्द्रको स्थापना गर्ने घोषणा पनि गरेका छन् । जसले भारत र सिंगापुरबीचको सांस्कृतिक सम्बन्धलाई अझ मजबुत पार्ने बताइएको छ । साथै, भारत र सिंगापुरबीच हवाई उडान सेवाहरू विस्तार गर्न पनि छलफल गरिएको छ ।
