काठमाडौँ । माओवादी केन्द्रका अध्यक्ष पुष्पकमल दाहाल (प्रचण्ड)ले नेपाल राष्ट्र बैंकको गभर्नर नियुक्तिमा गडबडी नगर्न चेतावनी दिएका छन् । राष्ट्र बैंकको गभर्नर योग्य व्यक्तिलाई बनाउनुपर्ने भन्दै प्रचण्डले गभर्नर नियुक्तिमा गडबडी नगर्न सरकारलाई चेतावनी दिएका हुन् ।
उनले गभर्नर नियुक्तिमा गडबडी भए र योग्य व्यक्ति नआए देशको अर्थव्यवस्था ध्वस्त हुने समेत बताएका छन् ।
त्यस्तै, प्रचण्डले हाल समस्यामा रहेको अर्थतन्त्र सुधार्न सक्ने योग्य व्यक्तिलाई राष्ट्र बैंकको गभर्नर बनाउन पनि सरकारसँग माग गरेका छन् । उनले गभर्नर नियुक्तिमा राजनीतिक भागबन्डा र स्वार्थ हेरे जनताको अवस्थामा गम्भीर असर पर्नसक्ने बताएका छन् ।
यता गभर्नर नियुक्तिको समय नजिकिँदै गर्दा गभर्नरका लागि बिचौलियाहरुले करोडौँको ‘डिल’ गरिरहेको चर्चा पनि बजारमा सुरु भएको छ । तथापि सरकारले गभर्नर कसलाई बनाउने भन्ने विषय टुंगो लगाइसकेको र सम्भवतः यही महिनामा राष्ट्र बैंकको नयाँ गभर्नर नियुक्त गरिने स्रोतले बताएको छ ।
