काठमाडौँ । काठमाडौँ महानगरपालिकाले एभरेष्ट अस्पताललाई कारवाही गरेको छ । हानिकारक फोहोरको व्यवस्थापन नगरेको भन्दै महानगरले नयाँ बानेश्वरमा रहेको एभरेष्ट अस्पताललाई कारवाही गरेको हो ।
कारवाहीस्वरुप महानगरले अस्पताललाई ५० हजार रुपैयाँ जरिवाना तिराउने निर्णय गरेको छ । सो निर्णयसहितको पत्र अस्पताललाई पठाएको महानगरले जनाएको छ ।
हानिकारक फोहोरको उचित व्यवस्थापन नगरेको र सुधारको मौकालाईसमेत बेवास्ता गरेपछि महानगरको वातावरण तथा प्राकृतिक स्रोत ऐन, २०७७ बमोजिम जरिवाना तिराउने निर्णय गरिएको महानगरले जनाएको छ ।
यसो त महानगरले एभरेष्ट अस्पताललाई यसभन्दा अघि पनि फोहोर व्यवस्थापन गर्न सचेत गराएको थियो । तर, महानगरको निर्देशन बेवास्ता गरेको पाइएपछि कारवाहीस्वरुप जरिवाना तिराइएको महानगरले जनाएको छ ।
