काठमाडौँ । लेखा व्यवसायीको चौँथो राष्ट्रिय सम्मेलन मंगलबार (चैत २६) देखि सुरु हुने भएको छ । कर र सार्वजनिक वित्तीय व्यवस्थापनको आधुनिकीकरणमार्फत अर्थतन्त्रको रूपान्तरण’ भन्ने नाराका साथ लेखा व्यवसायीको सम्मेलन मंगलबारदेखि सुरु हुने भएको हो ।
सम्मेलनको आयोजक नेपाल चार्टर्ड एकाउन्टेन्ट्स संस्था (आईक्यान) हो । आयोजकका अनुसार सम्मेलनमा लेखा व्यवसायी, नीति निर्माता, शिक्षाविद्, उद्योगीबीच कर प्रणाली र सार्वजनिक वित्तीय व्यवस्थापनको आधुनिकीकरण विषयमा अन्तरक्रिया हुनेछ । सम्मेलन दुई दिनसम्म चल्नेछ ।
सम्मेलनमा पाँच प्राविधिक तथा दुई पुरकसहित कुल ७ सत्र सञ्चालन हुँदैछन् । कर प्रणाली र सार्वजनिक वित्तीय व्यवस्थापनको आधुनिकीकरणका लागि गहन छलफलमार्फत उपयुक्त नीति निर्माण, पारदर्शिता र जवाफदेहिता प्रवर्द्धन गर्ने उद्देश्यले सम्मेलन गर्न लागिएको आईक्यानले जानकारी दिएको छ ।
आईक्यानका अनुसार सम्मेलनमा सञ्चालन हुने ७ सत्रमा ३५ वक्ता सहभागी हुनेछन् भने ४ जनाले प्रस्तुती दिनेछन् । पाँच जना अन्तर्राष्ट्रिय प्रतिनिधि समेत उपस्थित हुनेछन् भने सम्मेलनमा राष्ट्रिय/अन्तर्राष्ट्रिय गरी करिब एक हजारको सहभागिता रहने अनुमान गरिएको छ ।
मंगलबार हुने सम्मेलनको उद्घाटन कार्यक्रमलाई अर्थमन्त्री विष्णु पौडेलले सम्बोधन गर्ने कार्यक्रम रहेको छ । त्यस्तै, कार्यक्रममा राष्ट्रिय योजना आयोगका उपाध्यक्ष शिवराज अधिकारी, डेपुटी महालेखा परीक्षक बामदेभ शर्मा अधिकारी र दक्षिण एसियाली लेखा महासंघ अध्यक्ष अशाफाक युसुफ तोला समेत उपस्थित रहने बताइएको छ ।
