काठमाडौँ । निर्वाचन आयोगले आशिका तामाङको उम्मेदवारी खारेजीको विषय हल्ला मात्र भएको बताएको छ । बुधबार पत्रकार सम्मेलन गर्दै आयोगका प्रमुख निर्वाचन आयुक्त रामप्रसाद भण्डारीले बताएका हुन् ।

‘मलाई पनि उक्त विषयमा थुप्रै फोन आएका छन् । निर्वाचन आयोगमा उम्मेदवारी खारेज गर्ने उजुरी वा सिकायत परेको हामीलाई थाहा छैन ।’, प्रमुख निर्वाचन आयुक्त भण्डारीले भने, ‘उजुरी पर्यो र वस्तुगत रुपमा प्रमाणित भयो भने कानून अनुसार कारवाही गर्छौं ।’

बिहीबार सामाजिक सञ्जालमा एकाएक आशिका तामाङको उम्मेदवारी खारेजीको हल्ला चलेको थियो । आयोगले उक्त हल्ला केवल अफवाह भएको बताएको छ । 

तामाङले धादिङ १ मा राष्ट्रिय स्वतन्त्र पार्टी (रास्वपा) बाट उम्मेदवारी दिएकी छिन् । उम्मेदवारी खारेजीका विषयमा सामाजिक सञ्जालमा पोष्ट गर्दै तामाङले यस्ता अफवाहको पछि नलाग्न मतदाताहरुलाई आग्रह गरेकी छिन् ।