काठमाडौँ । बाढी पीडितका लागि पठाउन लागिएका खाद्यान्न म्याद गुज्रेको फेला परेको छ । खाद्य, प्रविधि तथा गुण नियन्त्रण विभाग र खाद्य, प्रविधि तथा गुण नियन्त्रण डिभिजन कार्यालय काठमाडौँको संयुक्त टोलीले गरेको अनुगमनका क्रममा राहतका लागि पठाउन लागिएका खाद्यान्न म्याद गुज्रेको फेला परेको हो । 

अनुगमनका क्रममा बाढीपीडितलाई वितरण गर्न ठिक पारिएका चामल, आटा, भुजा र चिप्स लगायतका खाद्य सामाग्री म्याद गुज्रिएको अवस्थामा फेला परेका छन् । 

विभागका अनुसार बबरमहलस्थित सहरी विकास तथा भवन निर्माण विभाग, सामाखुसीस्थित प्रहरी तालिम केन्द्र र राधा स्वामी सत्सङमा भण्डारण गरिएका राहत सामाग्री म्याद गुज्रेको अवस्थामा भेटिएका हुन् । 

सहरी विभाग तथा भवन निर्माण विभागमा यशोधा फुड्स प्रालि (रुपन्देही)को ‘करेन्ट चिप्स’ र गिरिधारी फुड प्रोडक्ट (बुटवल)को ‘भुजा’को म्याद सकिएको पाइएको छ । 

प्रहरी तालिम केन्द्रमा चोकोफन र पाँच किलोको एक प्याकेट चक्की आटा र राधा स्वामी सत्सङमा जयश्री उसिना चामल (२५ किलोको बोरा) म्याद गुज्रिएको भेटिएको हो । विभागले उपभोक्ताले प्रयोग गर्न नमिल्ने अवस्थामा भेटिएका ती खाद्यान्न नष्ट गरी थप कारवाही प्रक्रिया अघि बढाएको छ ।