">
काठमाडौं । बैंकहरु र मिटरब्याजीहरुको ऋण तिर्न नसकेपछि भागेका ग्रीनलाइनका सञ्चालक ओमप्रकाश अग्रवालको परिवार काठमाडौं आइपुगेको पाइएको छ । बुधबार साँझ फोन सम्पर्कमा आएका उनीहरु बिहीबार प्रशासनिक काम सकेर बैंक ब्यवस्थापनलाई भेट्न खोजेको ऋणी दिएका बैंकका सदस्यले बताएका छन् ।
अग्रवाल दाजुभाई अभिषेक अग्रवाल र अमित अग्रवाल आज बिहान जिल्ला प्रशासन कार्यालय काठमाडौंमा सुरक्षाका लागि पुगेका थिए। त्यसपछि जिल्ला अदालतमा रहेको लेनदेनसम्बन्धि मुद्दाको सुनुवाइमा सहभागी भएका थिए । यता हिजो अग्रवालकी छोरी रजनी अग्रवालले पनि आफ्नो बुबा सम्पर्कमा आएको भन्दै प्रहरीलाई सूचना दिएकी थिइन् ।
अग्रवाल परिवार सम्पर्कमा आएपछि बैंकहरु ऋण उठ्नेमा केही आशावादी देखिएका छन्। अग्रवाल परिवारले विभिन्न चार बैंकबाट ऋण लिएका थिए । यता बैंकहरुले ऋण उठाउनका लागि कानुनी कारवाही अगाडि बढाइसकेका छन्।एभरेष्ट बैंक, मेगा बैंक, नेपाल इन्भेष्टमेन्ट र ग्लोबल आइएमइ बैंकले उनीहरुलाई ऋण दिएका छन् । सबै बैंकले ऋण उठाउनका लागि लिलामी प्रकृया अगाडि बढाइसकेका छन्।
उनीहरुको ब्यापारमा एभरेष्टको करिब २२ करोड, नेपाल इन्भेष्टमेन्ट बैंकको करिब ३२ करोड, ग्लोबल आइएमइ बैंकको करिब १८ करोड र मेगा बैंकको करिब २५ करोड ऋण लगानी छ। यद्यपि मदिरा स्टक भएको गोदाममा एभरेष्ट र नेपाल इन्भेष्टमेन्ट बैंकले भने सिलबन्दी गरेका छन् । अग्रवाल परिवारले मिटर ब्याजमा पनि ऋण लिएका छन्।
