बैंकको सर्भर डाउन हुँदा निक्षेप संकलन, रकम भुक्तानीजस्ता काम प्रभावित बनेका छन् । राष्ट्रिय बाणिज्य बैंकका विभिन्न शाखाका कर्मचारीले सर्भरमा समस्या आएको पुष्टी गरेका छन् । ‘कहिले चल्छ, कहिले चल्दैन । अन्तिम समयमा यस्तो हुँदा धेरै ग्राहकको गाली खानु परेको छ । काम नभएर उस्तै हैरान छ ।’ काठमाडौँस्थित एक शाखाका कर्मचारीले अर्थ सरोकारसँग भने,  ‘तपाईं मिडियाको त सीइओ, आइटीसँग पनि पहुँच हुन्छ क्यार, यसो भनिदिनुपर्यो । यहाँ त ग्राहकले कुट्लान् भन्ने पीर भयो ।’

बैंकको सर्भरमा समस्या देखिंदा बैंकका धेरै ठाउँका ग्राहकहरुले कर्मचारीहरुलाई गाली गरिरहेको विभिन्न साखाका कर्मचारीहरुको गुनासो छ । ‘विहानदेखि सिष्टममा समस्या छ  । कहिले चल्छ, कहिले चल्दैन । ग्राहकहरुलाई पनि मर्का परेको छ । आज असार ३१ गते भएकाले धेरैलाई पेमेन्टको प्रेसर छ । यस्तो बेला सर्भर डाउन हुनु अफ्ट्यारो स्थिति हो। ‘ पोखराका एक साखाका कर्मचारीले भने- ‘देशभर आज समस्या छ । कतिपय ग्राहक त दुश्मनले पनि राष्ट्रिय बाणिज्य बैंकमा खाता नखोलोस्’ भनेर गाली गर्दै फर्कनुभएको छ ।

सर्भरमा समस्या हुँदा कतिपय ग्राहकहरु काम नै नभई फर्कनुपनि परेको छ । यसले एकातर्फ बैंकको छवि बिग्रिएको छ भने अन्तिम आवरमा काम नहुँदा राष्ट्रिय बाणिज्य बैंक आवश्यक पर्दा कहिले पनि काम लाग्ने रहेनछ भन्ने सन्देश गएको छ । ‘बैंकले आफ्नो भनेको आफ्नै हुन्छ भन्ने विज्ञापन बजाउँथ्यो, आफ्नो भनेको त यो बैंक त झन् साह्रो पर्दा पनि काम नलाग्ने धेरै पराई बैंक रहेछ ।’ काठमाडौँस्थित एक साखामा भेटिएका ग्राहकले भने ।

यता बैंक भने यस विषयमा आफुलाई केहि पनि थाहा नभएको बताउँछ । बैंकको केन्द्रीय कार्यालयमा फोन गरी सिष्टम डाउनबारे बुझ्दा त्यहाँका कर्मचारीले सिष्टम डाउन भएको स्वीकारे पनि यस विषयमा थप आफुलाई केहि पनि थाहा नभएको बताए । ‘हामीलाई यस विषयमा केहि पनि थाहा भएन । तर सिष्टममा समस्याचाहिं देखिएको छ’ यस विषयमा बैंकको आधिकारिक धारणा बुझ्न हामीले बैंकमा फोन गरी सूचना अधिकारीको नम्बर माग्यौं । तर बैंकका कर्मचारीले उत्तर दिए -‘हाम्रो बैंकमा त सूचना अधिकारी नै छैन। ‘