काठमाडौँ । नेपाल स्टक एक्सचेन्ज (नेप्से)ले हिमाल दोलखा हाइड्रोपावरको सेयर कारोबार रोक्का गरेको छ । हाइड्रोले बजार नीति विपरित काम गरेको र नेप्सेको नियम समेत उल्लंघन गरेको भन्दै नेप्सेले सेयर कारोबार रोक्का गरेको हो ।

दोस्रो बजारमा सेयर कारोबार भइरहेको समयमा हिमाल दोलखा हाइड्रोपावरको सञ्चालक समितिको बैठक बसी मूल्य संवेदनशील निर्णय गरेको भन्दै कारोबार रोकेको नेप्सेले जनाएको छ । नेप्सेका अनुसार हाइड्रोले बुक क्लोज गर्नुभन्दा ७ दिन अघि नै सूचना दिनुपर्ने नियमसमेत उल्लंघन गरेको छ । कारोबार रोक्का गर्दै नेप्सेले हिमाल दोलखा हाइड्रोपावरलाई स्पष्टीकरण समेत सोधेको छ । स्पष्टीकरण सोधिएको तीन दिनभित्रमा आफ्नो तर्कसहितको सपष्टीकरण पेश गर्न समेत निर्देशन दिएको छ ।

शुक्रबार ११ बजे बसेको हाइड्रोको सञ्चालक समितिको बैठकले ७५% अर्थात १००ः७५ अनुपातमा हकप्रद सेयर जारी गर्ने निर्णय गरेको थियो । आगामी भदौ ५ गते बस्ने वार्षिक साधारण सभामा हकप्रद प्रस्ताव पेश गर्ने निर्णय गर्दै सभा प्रयोजनका लागि साउन १९ गते बुक क्लोज गर्ने कम्पनीले जनाएको छ ।