काठमाडौं । नेपाल धितोपत्र बोर्डले धितोपत्र दलाल (ब्रोकर) कम्पनीहरुलाई १८ स्थानमा शाखा कार्यालय सञ्चालनका लागि अनुमति दिएको छ । यसअघि सैद्दान्तिक सहमति पाएर पनि बोर्डको अन्तिम स्वीकृति पर्खिएका १२ ब्रोकर कम्पनीलाई अन्ततः धितोपत्र बोर्डले स्वीकृति प्रदान गरेको हो ।

बोर्डले २०७७ सालमा १२ वटा धितोपत्र दलाल (ब्रोकर) कम्पनीलाई २३ स्थानमा शाखा खोल्ने सैद्दान्तिक सहमति दिएको थियो । जसमध्ये गत आर्थिक वर्ष २०७८÷७९ र चालु आर्थिक वर्ष २०७९÷८० मा गरि १२ कम्पनीले उपत्यका बाहिर १८ स्थानमा शाखा खोल्ने अन्तिम स्वीकृत पाएको बोर्डले जनाएको छ ।

गत आर्थिक वर्षमा ब्रोकर नंम्बर ३४ भिजन सेक्युरिटिज प्रालीले नवलपुरको कावासोती, म्यादीको बेनी र तनहुँको दमौलीमा आफ्नो शाखा विस्तार गरी सेवा सञ्चालन गरिसकेको छन् । ब्रोकर नम्बर ४९ अनलाइन सेक्युरिटिजले नुवाकोटको बटार, ब्रोकर नम्बर ३८ दिपशिखा धितोपत्र कारोबार कम्पनीले चितवनको टांडीमा, ब्रोकर नम्बर १४ नेपाल स्टक हाउसले नुवाकोटको बिदुर र कैलालीको टिकापूरमा शाखा सञ्चालन ल्याइसकेका छन् । त्यस्तै कैलालीका लम्कीमा पनि शाखा सञ्चालन गर्नका लागि ब्रोकर नम्बर ३८ दिपशिखा धितोपत्र कारोबार कम्पनीले नै शाखा सञ्चालन गर्न अन्तिम स्वीकृति पाएको बोर्डले जनाएको छ ।

यता बोर्डले चालु आर्थिक वर्ष लागेपछि बोर्डले ब्रोकर नम्बर ५७ आर्यतारा इन्भेष्टमेन्ट एण्ड सेक्युरिटिज प्रालिलाई पाल्पाको तानेसेन र रुपन्देहीको भैरहवामा, ब्रोकर नंम्बर ११ मल्ल एण्ड मल्ल स्टक ब्रोकिङ प्रालीलाई पाँचथरको फिदिम र इलाममा शाखा कार्यालय स्थापना गर्ने अन्तिम स्वीकृति दिएको छ । यस्तै ब्रोकर नम्बर ३६ सेक्युर्ड सेक्युरिटिजले झापाको दमक, ब्रोकर नंम्बर २९ त्रिशुल सेक्युरिटिजले नवलपुरको कावासोती, ब्रोकर नंम्बर ५१ अक्सफोर्ड सेक्युरिटिजले नवलपुरको भुमहीमा र ब्रोकर नंम्बर ५९ नम्बर ब्रोकर दिव्या सेक्युरिटिज एण्ड स्टक हाउसले पर्वतको कुस्मामा शाखा खोल्न अनुमति दिएको बोर्डले जनाएको छ ।

बोर्डका अनुसार ब्रोकर नम्बर ७ जेएफ सेक्युरिटिज प्रालीलाई दाङको तुलसीपुर, ब्रोकर नम्बर ४४ डाइनामिक मनी म्यानेजर्स सेक्युरिटिजले चितवनको भरतपुरमा शाखो खोल्ने अन्तिम स्वीकृत पाएका छन् । यता बोर्डको सैद्दान्तिक सहमति पाएको ब्रोकर नंम्बर ४९ (अनलाइन सेक्युरिटिज)ले रामेछापको मन्थली, महोत्तरीको बर्दिबास र मोरङको उर्लाबारीमा शाखा सञ्चालनको अन्तिम स्वीकृति पाउन बाँकी रहेको छ । त्यस्तै ब्रोकर नम्बर ३८ दिपशिखा धितोपत्र कारोबार कम्पनीको सिरहाको लाहान र दोलखाको चरीकोटमा शाखा सञ्चालनको अन्तिम सैद्दान्तिम सहमति दिएको भएपनि आवश्यक पुर्वाधार तयार नहुँदा अन्तिम स्वीकृति दिन बाँकी रहेको बोर्डले जनाएको छ ।