काठमाडौं । वित्तीय संस्थाबाट लिएको ऋण तिर्न नसक्दा एक महिलाले आत्महत्या गरेकी छिन् । कैलालीको गौरिगंगा नगरपालिका वडा नम्बर १ कि ३७ वर्षिया रेश्मा चौधरीले भदौ दुई गते विष सेवन गरी आत्महत्या गरेकी हुन् । रेश्माले युनिक नेपाल लघुवित्त वित्तीय संस्था लिमिटेडबाट ३ लाख २० हजार ऋण लिएकी थिईन् । सो ऋण तिर्न नसकेपछि वित्तीय संस्थाले दिएको प्रेसरका कारण रेश्माले आत्महत्या गरेको स्थानीयले बताएका छन् ।
युनिक नेपालले घर जग्गा बेचेरै ऋण तिर्छु भन्दाभन्दै आत्महत्या गर्न बाध्य बनायो
युनिक नेपाल लघुवित्त वित्तीय संस्थाबाट रेश्माले लिएको ३ लाख २० हजारमध्ये २ लाख ३९ हजार तिर्न बाँकी थियो । भदौ १ गते संस्थाको केन्द्र समुह बैठकमा नियमित किस्ता र ऋण ब्याज तिर्न नसकेपछि संस्थाले दबाब दिन भन्दै सूचना टाँस गर्दै बिहान ११ बजे उनको घरमा तालाबन्दी गरेको थियो । सूचना टाँस गरेर घरमा तालाबन्दी गरेपछि पनि रेश्मा किस्ता तिर्न नआएपछि पुनः संस्थाका कर्मचारी दबाब दिन भन्दै उनको घरमै पुगेका थिए ।
‘रेश्माले कमजोर आर्थिक अवस्थाका कारण तत्कालै रकम तिर्न नसक्ने बताएकी थिइन्’, संस्थाका एक कर्मचारीले भने, ‘उनले ३ महिनाभित्र घरजग्गा बेचेरै भएपनि ऋण तिर्ने भन्दै भाका मागेकी थिईन् ।’ तर उनलाई जसरी भएपनि पैसा तिर्नुहोस् भन्दै संस्थाका कर्मचारीहरुले दबाब दिएका थिए । ऋण तिर्छु भन्दाभन्दै पनि वित्तीय संस्थाले असह्य दबाब दिएपछि रेश्माले भदौ २ गते विष सेवन गरी आत्महत्या गरेको मृतकका छोरा सरोज चौधरीले बताएका छन् । ‘ऋण लिएको हो तर तिर्छु भन्दाभन्दै संस्थाका कर्मचारीले पालैपालो घरमै आएर दबाब दिए । त्यही तनाब सहन नसकेर आत्महत्या गर्नुभयो’, उनले भने, ‘कमसेकम अवस्था बुझेर केही समय भाका दिएको भए ज्यानै जाने त थिएन ।’
के भन्छ प्रहरी ?
यता युनिक नेपाल लघुवित्त वित्तीय संस्थाले रेश्माले ऋण तिर्न नसक्दा उनको ऋणको साक्षी बसेकाहरुले संस्थाबाट ऋण लिन नमिल्ने भएपछि दबाब दिएको बताएको छ । मृतक रेश्माले किस्ता नतिरेपछि केन्द्रका सदस्यहरुको सल्लाह अनुसार दबाब दिन तालबन्दी गरेको संस्थाको भनाई छ । तर तालबन्दीको जानकारी भने प्रहरीमा नगरेको इलाका प्रहरी कार्यालय चौमालाका प्रमुख तथा प्रहरी नायब निरिक्षक विशनदत्त भट्टले बताएका छन् । ‘रेश्माले लघुवित्तबाट लिएको ऋणको ६ किस्ता तिरेकी रहिछन् । तर लगातार किस्ता नतिरेपछि संस्थाका कर्मचारीले उनको घरमा गएर दबाब दिएका रहेछन् र तनाब सहन नसकेपछि उनले विष सेवन गरी आत्महत्या गरेको भन्ने बुभिएको छ’ प्रहरी नायब निरिक्षक भट्टले भने, ‘घरमा ताला लगाएको विषयमा हामीलाई कुनै जानकारी छैन । हामीले त उनले विष सेवन गरेपछि मात्रै थाहा पाएका हौँ । शनिबार उनको दाहसंस्कार भएको छ ।’
गौरिगंगा नगरपालिकामा रेश्माले भदौ २ गते साँझ करिब ६ बजेको समयमा विष सेवन गरेकी थिईन् । साढे ७ बजे उपचारका लागि सेती प्रादेशिक अस्पताल ल्याइएको र राती १० बजेको समयमा उनको मृत्यु भएको जिल्ला प्रहरी कार्यालय कैलालीका प्रहरी निरिक्षक खगेन्द्र साउँदले जानकारी दिएका छन् । ‘विष सेवन गरी आत्महत्या गरेको भन्ने विषयमा प्रहरीमा जाहेरी परेको थियो तर के कारणले भन्ने उल्लेख गरिएको थिएन । तर बुझ्दै जाँदा ऋण तिर्न नसकेरै आत्महत्या गरेको भन्ने बुझिएको छ ।’ जिल्ला प्रहरी कार्यालय कैलालीका प्रहरी निरिक्षक खगेन्द्र साउँदले भने –‘रेश्माले छोरीका नाममा पनि ऋण लिएकी रहिछन् र छोरीले पनि ऋणका कारण आफ्नो घरमा समस्या भएको बताएको र संस्थाले पनि ऋण तिर्न प्रेसर दिँदा विष सेवन गरेको भन्ने प्रारम्भिक अनुसन्धानमा देखिन्छ । तर घटनाको बाँकी पाटो अनुसन्धानकै क्रममा रहेको हुँदा थप कुरा भने त्यसपछि नै थाहा हुन्छ ।’
