काठमाडौँ । लामो समयको रस्साकस्सी र ब्रोकरहरुको चलखेलका बाबजुत धितोपत्र व्यवसायी (धितोपत्र दलाल तथा धितोपत्र ब्यापारी) पाचौं संसोधन नियमावली, २०७९ धितोपत्र बोर्डले सार्वजनिक गरेको छ । क्याबिनेटबाट पास भई प्रमाणीकरणसमेत भएर आएपछि बोर्डले तुरुन्तै यसलाई सार्वजनिक गरेको हो । बोर्डमा बुधबारमात्रै सो नियमावली पास भएको औपचारिक पत्र आएको थियो । बुधबार नै सो नियमावलीको पाचौँ संसोधन बोर्डको वेवसाइटमा अपलोड गर्न बोर्ड अध्यक्ष रमेश हमालले निर्देशन दिएका थिए । सोहि अनुरुप बुधबार अबेर सो संसोधन बोर्डको वेवसाइटमा अपलोड भएको हो ।
ब्रोकरहरुको चलखेलका कारण तत्काल लाइसेन्स वितरण नहुनेगरी भाषा बिगारिएको चौथो संसोधनलाई धितोपत्र बोर्डले पुन: संसोधनका लागि क्याबिनेट पठाएको थियो । यो संसोधन रोक्न ब्रोकरहरुले निकै प्रयास गरेका थिए । यसअघिको चौथो संसोधनमै ब्रोकर लाइसेन्स तत्काल नखोल्नेगरी भाषामा राजनीति गरेर ब्रोकरहरुले ठुलै चलखेल गरेका थिए । तर रमेश हमालले पनि कुनै पनि हालतमा तत्काल ब्रोकर लाइसेन्स खुल्नेगरी नियमावली संसोधन बोर्डले पारित गरेकाले क्याबिनेटबाट पास भएको संसोधनमा असन्तुष्टी जनाउँदै पुन: संसोधनका लागि पठाएका थिए ।
संशोधित नियमावली अनुसार अव तत्काल ब्रोकर लाइसेन्स खुल्नेछ भने त्यसपछि अर्को ३ बर्षमा पुन: लाइसेन्स खुल्नेछ । ब्रोकर लाईसेन्सको लागि ३० दिनको अवधि राखेर सूचना प्रकाशन गर्ने र ३५ दिन भित्र बोर्डले लाईसेन्स दिई सक्ने व्यवस्था गरिएको छ । अन्य व्यवस्था चौथो संसोधनकै अनुसार छ । पाचौँ संसोधन सार्वजनिक भएपछि लगानीकर्ताले बोर्ड अध्यक्ष हामालको खुलेरै प्रशंसा गर्न थालेका छन् । धेरैले यसलाई हमालले गरेको आँटिलो र ऐतिहासिक कामसमेत भनेका छन् ।
अघिल्लो संसोधनको निरन्तरता अनुसार नै नियमावलीमा सिमित कार्य गर्ने ब्रोकर, पूर्ण कार्य गर्ने ब्रोकर र स्टक डिलर गरी तीन तहको धितोपत्र दलाल व्यवसायी विभाजन गरिएको छ । जसमा न्यूनतम चुक्ता पूँजी २० करोडदेखि डेढ अर्ब रुपैयाँसम्म कायम गरिएको छ । नियमावली अनुसार सिमित कार्य गर्ने ब्रोकरको चुक्ता पूँजी २० करोड, पूर्ण कार्य गर्ने ब्रोकरको चुक्ता पूँजी ६० करोड र स्टक डिलरको चुक्ता पूँजी डेढ अर्ब तोकिएको छ । हाल संचालन भईरहेका ब्रोकरहरुको हकमा भने उनीहरुले पूँजी बढाउका लागि ३ बर्ष समय पाउनेछन् ।
बोर्ड अध्यक्ष रमेश हमालका अनुसार अवको केहि दिनमा नयाँ लाइसेन्सका लागि औपचारिक प्रक्रिया सुरु हुनेछ । ‘यो मेरो मात्र होइन सबैको जित हो । केहि दिनमा लाइसेन्सको आह्वान हुनेछ ।’ बोर्ड अध्यक्ष हमालले अर्थ सरोकारसँग भने- ‘लगानीकर्ताका पक्षमा अन्य धेरै काम गर्न बाँकी छ।’
हेर्नुहोस् सो नियमावलीको पाचौँ संसोधन
