काठमाडौं । सूर्या लाइफ इन्स्योरेससँग मर्जरको प्रक्रियामा रहेको ज्योति लाइफ इन्स्योरेन्सले चालु आर्थिक वर्षको पहिलो त्रैमाससम्मको वित्तीय विवरण सार्वजनिक गरेको छ । जसमा कम्पनीले गतवर्षको तुलनामा १३३.२८ प्रतिशत बढी खुद नाफा आर्जन गरेको छ ।

चालु आर्थिक वर्षको पहिलो त्रैमाससम्ममा कम्पनीको खुद नाफा २१ करोड ५२ लाख ७१ हजार रुपैयाँ पुगेको छ । गत वर्षको सोही अवधिमा कम्पनीले ९ करोड २२ लाख रुपैयाँ नाफा कमाएको थियो । नाफासँगै कम्पनीको खुद बीमा शुल्क आर्जनमा पनि वृद्धि भएको छ । समिक्षा अवधिसम्म कम्पनीको यस्तो शुल्क १५.६७ प्रतिशतले वृद्धि हुँदै ९१ करोड ४० लाख रुपैयाँ पुगेको छ ।

यता कम्पनीको लगानी कर्जा तथा अन्य आयबाट हुने आम्दानी पनि बढेको छ भने नोक्सानी व्यवस्थाबाट २ करोड ४५ लाख रुपैयाँ फिर्ता गरेपछि खुद नाफामा सुधार भएको कम्पनीको प्रक्षेपण रहेको छ ।

कम्पनीले सार्वजनिक गरेको वित्तीय विवरण अनुसार पहिलो त्रैमाससम्ममा कम्पनीको जगेडा कोष ५६.६९ प्रतिशतले बढेर १ अर्ब ३ करोड ५७ लाख रुपैयाँ पुगेको छ । यस्तै, जीवन बिमा कोषको आकार ४ अर्ब ४ करोड ६९ लाख रुपैयाँ पुगेको भने कम्पनीको चुक्ता पुँजी २ अर्ब ४२ करोड रुपैयाँ रहेको छ ।