">
काठमाडौं । काठमाडौंको थापाथलीस्थित बागमती किनारमा रहेको सुकुम्बासी बस्ती हटाउन पुगेको महानगरको टोलीमाथि स्थानीयले आक्रमण गरे । ढुंगा, पेट्रोल बम, ईंटा र घरेलु हतियारसहित प्रतिकारमा उत्रिएका बस्तीका स्थानीयको आक्रमणबाट महानगरको टोलीका दर्जनौ सदस्य घाइते भए ।
स्थानीयले ढुंगामात्रै प्रहार गरेनन्, बरु सडकमा टायर बालेर नाराबाजीसमेत गरे । उनीहरुले काठमाडौं महानगरपालिकाका नगर प्रमुख बालेन्द्र साह (बालेन)को राजिनामा माग गर्दै नारा लगाए ।
‘बालेन साह राजिनामा दे’, ‘ज्यान जाला छोड्दैनौ, मर्न पछि हट्दैनौ’, ‘बालेन साह मुर्दावाद’, – उनीहरु चिच्याईरहेका थिए । तर, एकाएक बालेन साहको विरोधमा आन्दोलन गरिरहेका आन्दोलनकारीले नारा बिर्सिए, र भन्न थाले – ‘बालेन साह हाई हाई, बालेन साह हाई हाई ।’
बालेन साहको विरोधमा गरिएको नाराबाजीमा आन्दोलनका अगुवाले ‘बालेन साह हाई हाई’ भनेपछि अन्य आन्दोलनकारीले पनि केहि समय साथ दिए । तर, केहिबेरमा उनीहरु रोकिए । र पुन: बालेन साह मुर्दाबाद भन्दै उर्लिन थाले ।
