काठमाडौं । क्रिप्टोमा अत्याधिक लगानीका कारण अमेरिकाको सिलिकन भ्याली बैंक बन्द भएको ४८ घण्टामै अमेरिकामा थप अर्को बैंक पनि बन्द भएको छ । अन्तराष्ट्रिय सञ्चार माध्यमका अनुसार पछिल्लो पटक अमेरिकाको न्यूयोर्कस्थित सिग्नेचर बैंक बन्द भएको हो । आइतबार साँझ संयुक्त विज्ञप्ती जारी गर्दै अमेरिकी नियामकहरु (ट्रेजरी, फेडरल रिजर्भ र एफडीआईसी)ले सिग्नेचर बैंक बन्द भएको घोषणा गरेका हुन् ।
सिग्नेचर बैंक क्रिप्टोमा लगानी गर्नेमध्येको मुख्य बैंक हो । धितोपत्र फाइलिङ अनुसार डिसेम्बर ३१ सम्म सिग्नेचर बैंकको कुल सम्पत्ति ११० दशमलव ४ बिलियन र कुल डिपोजिट ८८ दशमलव ६ बिलियन डलर थियो । सेप्टेम्बरसम्म सिग्नेचर बैंकको निक्षेपको करिब एक चौथाइ क्रिप्टोकरेन्सी क्षेत्रबाट आएको थियो । तर, बैंकले डिसेम्बरमा आफ्नो स्क्रिप्ट-सम्बन्धित निक्षेपहरू ८ बिलियन डलरले घटाउने घोषणा गरेको थियो ।
बैंकमा तरलता संकट चुलिएपछि अमरिकी नियामकहरुले बैंक बन्द गरिएको जानकारी दिएका छन् । यद्यपी सिग्नेचर बैंकका सम्पूर्ण ग्राहकहरुको निक्षेप सुरक्षित रहेको समेत नियामकहरुले जनाएका छन् । बैकिङ नियामकका अनुसार बन्द भएको सिग्नेचर बैंकका निक्षेपकर्ताहरुले सोमबारदेखि नै आफ्नो निक्षेपमा पूर्ण पहुँच पाएका छन् ।
यो सँगै अमेरिकामा पछिल्लो एक सातामा तीन वटा बैंक बन्द भएका छन् । शुक्रबार सिलिकन भ्याली बैंक बन्द हुनु अगाडि मार्च ९ मा सिल्भरगेट बैंक बन्द भएको थियो ।
