काठमाडौं । नेपाल स्टक एक्सचेन्ज (नेप्से)ले राष्ट्र उत्थान लघुवित्त वित्तीय संस्थाको सेयर कारोबार रोक्का गरेको छ । धितोपत्र मूल्यमा प्रभाव पार्ने सूचना ढिलोगरी दिएको भन्दै नेप्सेले लघुवित्तको सेयर कारोबार रोक्का गरेको हो ।

लघुवित्तले बैशाख १३ गते नै गत आर्थिक वर्षको मुनाफाबाट १५ प्रतिशत लाभांश दिने निर्णय गरेको थियो । कम्पनीको सञ्चालक समितिको बैठकले सेयरधनीहरुलाई १४.२५ प्रतिशत बोनस सेयर र कर प्रयोजनका लागि ०.७५ प्रतिशत नगद लाभांश दिने निर्णय गरेको थियो । तर, लाभांश वितरणसम्बन्धी सूचना लघुवित्तले १९ गते मात्र कारोबार समयमा दिएको थियो । सोही कारण लघुवित्तको सेयर कारोबार रोक्का गरेको नेप्सेले जनाएको छ ।

त्यस्तै, लघुवित्तको सेयर कारोबार रोक्का गर्दै नेप्सेले ३ दिनभित्रमा स्पष्टिकरण पेश गर्न समेत निर्देशन दिएको छ । ‘कम्पनीको धितोपत्र स्थगत गरिएको साथै यो पत्र प्राप्त भएको मितिले तीन कार्यदिन भित्र के कति कारणबाट समयमा नै जानकारी दिन नसकेको हो ? सो सम्बन्धमा स्पष्टिकरण पेश गर्न निर्णायनुसार अनुरोध छ ।’- नेप्सेको सूचनामा उल्लेख गरिएको छ ।

लघुवित्तले प्रस्ताव गरेको लाभांश भने नेपाल राष्ट्र बैंकको स्वकृति र संस्थाको आगामी वार्षिक साधारणसभाले पारित गरेपछि वितरण गरिनेछ ।