काठमाडौं । सेयर गुरु सुवासचन्द्र भट्टराईले आर्थिक विधेयकको २९ नम्बर बुँदा हटाउने सहमतिसँगै जितको सुरुवात भएको बताएका छन् । भट्टराईले लगानीकर्ताको मागमध्येको २९ नम्बर बुँदा हटाउने अर्थमन्त्रालयको सहमतिसँगै लगानीकर्ताको संघर्ष जिततर्फ उन्मुख भएको बताएका हुन् ।

लगानीकर्ता र अर्थमन्त्रीसँगको वार्ता सफल भए पनि यो जित पूर्ण नभएको भट्टराईको भनाई छ । ‘हामीले जितेका हौँ तर हामीले पूर्ण रुपमा जितेको होइन ।’, उनले भने, ‘यो आंशिक जित हो । हाम्रो दाबी आर्थिक विधेयकको २६ र २७ नम्बर बुँदा पनि हो तर हाल २९ नम्बर बुँदामात्रै सम्बोधन भएको छ ।’

आफूहरुको मागमध्येको २६ र २७ नम्बर बुँदाप्रतिको विमति अझै पनि कायम रहेकोले जित अझै बाँकी रहेको भट्टराईले बताएका छन् । ‘अहिले २९ नम्बर बुँदा मात्रै हटेको हो । हाम्रो विमति भनेको बुँदा नम्बर २६ र २७ मा पनि हो । तर, अर्थमन्त्रीसँगको वार्तामा अर्थमन्त्रीले तपाईहरु २६ र २७ को सरोकारवाला होइन, सरोकारवाला भएका आउनुस् भनेपछि थप जोड गर्न सकिएन ।’, उनले भने, ‘अब २६ र २७ नम्बर बुँदाका लागि बैंकर्स एसोसियसन गएर अर्थमन्त्रीसँग वार्ता गर्नुहुन्छ ।’

तथापी लगानीकर्ता र अर्थमन्त्रालयबीचको सहमतिले सेयर बजारलाई थप धरासायी हुनबाट जोगाएको भट्टराईले बताएका छन् । यसले लगानीकर्ताको संघर्षलाई जिततर्फ उन्मुख गराएको उनको भनाई रहेको छ ।