काठमाडौं । ऋण नतिर्ने बाहनामा बैंक तथा वित्तीय संस्थामाथि आक्रमण भएको भन्दै बैंक तथा वित्तीय संस्थासँग सम्बन्धित चारवटा संस्थाले संयुक्त रुपमा आपत्ति जनाएका छन् । सोमबार नेपाल बैंकर्स संघ, डेभलपमेन्ट बैंकर्स एशोसिएसन नेपाल, नेपाल वित्तीय संस्था संघ र नेपाल लघुवित्त बैंकर्स संघले एक विज्ञप्ती जारी गर्दै बैंक तथा वित्तीय संस्थामाथि भएको आक्रमणप्रति आपत्ति जनाएका हुन् ।

सोमबार पूवी नेपालको इटहरी, सुनसरीमा रहेका बैंक तथा वित्तीय संस्थाका शाखाहरुमा केही व्यक्तिहरुले अभद्र व्यवहार गर्नुका साथै बैंकका कर्मचारीलाई धम्क्याएर सेवा प्रवाहमा अवरोध गरेको भन्दै उनीहले आपत्ति जनाएका हुन् ।

नागरिकको सेवाका लागि खटिएका बैंक तथा वित्तीय संस्थामा अराजक गतिविधि बढ्न थालेपछि सुरक्षा थ्रेड बढेको भन्दै सुरक्षा प्रबन्ध मिलाउन समेत उनीहरुले सुरक्षा निकायसँग माग गरेका छन् । अर्थतन्त्रको मुख्य स्तम्भको रुपमा रहेका बैंक, वित्तीय तथा लघुवित्त संस्थाहरुले मुलुकको विकास, आम सर्वसाधारणलाई प्रदान गर्ने सेवा–सुविधाहरु, आर्थिक वृद्धिमा खेलेका भुमिका, रोजगारी सिर्जना लगायत प्रत्यक्ष÷अप्रत्यक्ष रुपमा दिएको योगदानका बारेमा उनीहरुले सचेत समेत गराएका छन् ।