काठमाडौं । मंगलबार सोलुखुम्बुबाट काठमाडौंका लागि उडेको मनाङ एयरको हेलिकप्टर दुर्घटनामा परी हेलिकप्टरमा सवार ६ जनाको मृत्यु भएको छ । पाइलट चेत गुरुङले उडाएको उक्त हेलिकप्टर मंगलबार बिहान सोलुखुम्बुको लिखुपिके गाउँपालिका ५ लामजुरामा दुर्घटनाग्रस्त अवस्थामा भेटिएको हो ।
हेलिकप्टरमा पाइलट गुरुङसँगै सवार मेक्सिकोका नागरिकहरु फर्नान्डो सिफुग्रेट्स, रिनकल इसमाइल, एबरिका गोन्जालेक्स, ओलासियो गोन्जानेक्स र मारिया होजे सिफुन्तेसको मृत्यु भएको लिखुपिके गाउँपालिकाकी अध्यक्ष मिना कार्की बस्नेतले पुष्टी गरेकी छिन् ।
भौगोलिक अफ्ठ्यारोका कारण मनाङ एयरको हेलिकप्टर दुर्घटना भएको ठाउँमा हेलिकप्टर वा अन्य सवारीसाधन पुग्न नसक्ने गाउँपालिका अध्यक्ष कार्कीले बताइन् ।
उता हेलिकप्टर दुर्घटनाका प्रत्यक्षदर्शीले भने हेलिकप्टर रुखमा ठोक्किएर दुर्घटना भएको बताएका छन् । दुर्घटनामा परेको हेलिकप्टर टुक्रा-टुक्रा भएको प्रत्यक्षदर्शीले बताएका छन् । उक्त क्षेत्रमा उद्धार टोली जाँदैछ ।
हाल दुर्घटना क्षेत्रबाट शव उद्धारको काम चलिरहेको छ ।
