काठमाडौं । त्रिभुवन अन्तराष्ट्रिय विमानस्थलबाट बरामद गरिएको करिब १०० किलो सुन जाँचपासका क्रममा एक्सरेमा डिटेक्ट भएको पाइएको छ । क्याथे प्यासिफिक एयरलाइन्सको विमानमार्फत हङकङबाट आएको ‘अटो पार्टस्’ लेखिएको कार्गो विमानबाट ल्याइएको उक्त सुन जाँचपासका क्रममा एक्सरेमा डिटेक्ट भएको पाइएको हो ।
भन्सार जाँचका क्रममा रेडी ट्रेड प्रा.लि.को नाममा ८ वटा प्याकेटमा ल्याइएको मोटरसाइकल र स्कुटरको १६० वटा ‘ब्रेक शु’ जाँचका क्रममा एक्सरेमा डिटेक्ट भएको थियो । भन्सार जाँचका क्रममा देखिएको ‘फलामको कालो डल्लो’ सुन हो भन्ने नलागेपछि छोडिएको भन्सारका कर्मचारीको भनाई रहेको छ ।
यसरी जाँचपासका क्रममा एक्सरेमा डिटेक्ट भइसकेको सुन विमानस्थलबाट बाहिरिएपछि राजस्व अनुसन्धान विभागको टोलीले उक्त सामान बोकेको बा २ ज २३२४ नम्बरको ट्याक्सी र चालक अशोक लामालाई नियन्त्रमा लिएको थियो । हाल उक्त प्रकरणमा प्रहरीले चिनियाँ नागरिकसहित १० जनालाई पक्राउ गरिसकेको छ ।
हालसम्म पक्राउ पर्नेमा सुन तस्करी प्रकरणका नाइके भनिएका चिनियाँ नागरिक जीक्वाङ लिन, भन्सार एजेन्ट राजेन्द्र राई, कम्पनीका सञ्चालक भोजपुरका दिलीप भुजेल, उनका मामा दोलखाका रामकुमार भुजेल, भोजपुरका हर्कराज राई र तिब्बती मुलका भारतीय नागरिक थाप्तेन छिरिङ रहेका छन् । विभागले उक्त प्रकरणमा विमानस्थल संयन्त्रको संलग्ताको आशंकामा विशेष अपरेशन सुरु गरेको छ ।
