काठमाडौं । त्रिभुवन अन्तराष्ट्रिय विमानस्थलबाट बरामद गरिएको १०० किलो सुनसहितको स्कुटरको ‘ब्रेक शु’को आयाकर्ता रेडी ट्रेडर्सले नै आयात गरेका थप ६ वटा कार्टुन विमानस्थल भन्सार गोदाममा भेटिएको छ । सुन तस्करी प्रकरणमा थप सुन विमानस्थलभित्रै रहेको आशंकामा राजस्व अनुसन्धान विभागले गरेको विशेष अपरेशनका क्रममा थप ६ कार्टुन सामान फेला पारेको हो ।

सुन आयात गरेकै कम्पनीले ल्याएको ती कार्टुनभित्र पनि सुन हुनसक्ने आशंका गरिएको छ । ‘हामीले विशेष अपरेशनका क्रममा दिनभर विमानस्थल परिरसमा सुनको खोजी गर्दा ६ वटा कार्टुल फेला पारेका छौँ ।’, विभागका एक उच्च अधिकारीले भने, ‘ती कार्टुनमा पनि सुन हुनसक्ने आशंका गरिएको छ ।’

दिनभर विमानस्थल परिसरमा सुनको खोजी गरिरहेको राजस्व अनुसन्धान विभागले साँझ ती कार्टुन फेला पारेको हो । सुन आयात भएकै कम्पनीले ल्याएका ती कार्टुनभित्र सुन हुन सक्ने आशंका विभागले गरेको छ ।

विभागका ती अधिकारीका अनुसार सो वस्तुलाई सिलबन्दी गरेर थप अनुसन्धानका लागि राजस्व अनुसन्धान विभाग हरिहर भवन पठाइएको छ ।