काठमाडौं । काठमाडौं महानगरपालिकाले टिपटप समोसा पसललाई कारवाही गरेको छ । बजार अनुगमनका क्रममा अखाद्य वस्तु बेचेको पाइएपछि महानगरले टिपटपलाई कारवाही गरेको हो ।
काठमाडौं महानगरपालिका मा रहेको टिपटप समोसा पसलले उपभोक्तालाई अखाद्य वस्तु बेचेको पाइएपछि कारवाही गरिएको महानगरले जनाएको छ । महानगरका अनुसार उक्त पसललाई कारबाहीस्वरूप दुई लाख रुपैयाँ जरिवाना तिराइएको छ ।
उक्त पसलले उत्पादन गरेर बिक्री गरेको दूधबरी सडेको पाइएको अनुगमन टोलीका प्रमुख डा.अवधेशकुमार झाले बताएका छन् । झाका अनुसार उक्त वस्तु पूर्ण रुपमा बिग्रिएको पाइएको छ । जुन मानव स्वास्थ्यका लागि हानिकारक हुन्छ ।
यसरी उपभोक्ताको स्वास्थ्यमाथि गम्भीर असर पर्ने अखाद्य वस्तु बेचेको पाइएपछि कारवाही गरेको महानगरले जनाएको छ । योसँगै महानगरले पसलमा अखाद्य वस्तु नराख्न, दूधजन्य वस्तुको तापक्रम कायम राख्नसमेत मातहतका सबै पसलहरुलाई निर्देशन दिएको छ ।
