काठमाडौँ । नेपाल बैंकको सीइओ बन्न १९ जनाले आवेदन दिएकोमा पाँच जनाको नाम ‘सर्ट लिष्टिङ’मा परेको छ । बैंकले आइतबार एक सूचना जारी गर्दै ‘सर्ट लिष्टिङ’ पर्ने पाँच जनाको नाम सार्वजनिक गरेको हो ।
सञ्चालक समितिबाट गठित प्रमुख कार्यकारी अधिकृत (सीइओ) नियुक्ति सिफारिस सम्बन्धी उपमसतिको पुष १ गतेको बैठकले बैंकको सीइओका लागि पाँच जनाको नाम ‘सर्ट लिष्टिङ’ गरेको हो ।
‘सर्टलिष्ट’मा पर्नेमा अशोक कुमार पौडेल, तिलक राज पाण्डेय, ध्रुवचन्द्र गौतम, लक्ष्मण पौडेल र समता पन्त रहेका छन् । उनीहरुलाई सीइओ पदपूर्ति सम्बन्धी कार्यविधि, २०८० को दफा ८(१) मा भएको व्यवस्था अनुसार शैक्षिक योग्यता, कार्यानुवभ र व्यवसायिक कार्य योजनाको मूल्यांकनमा प्राप्त गरेको प्राप्तांकको याग्यताक्रमको आधारमा ‘सर्ट लिष्टिङ’ गरिएको बैंकले जनाएको छ ।
अब ‘सर्टलिष्ट’मा परेका उम्मेदवारहरु मध्ये प्रस्तुतीकरण र अन्तर्वार्तामा उत्कृष्ट एकजनालाई बैंकको प्रमुख कार्यकारी अधिकृतमा नियुक्त गरिनेछ ।
तर, बैंकको सीइओका लागि हल्ला गरिएकाहरु भने ‘सर्टलिष्ट’मा परेनन् । यसो त बैंकको सीइओका लागि आवेदन दिने बेलामै बैंकको सीइओ को ? भन्नेबारे बहस नै छेडिएको थियो । तर, आवेदन परेका १९ जना उम्मेदवारबाट बैंकको ‘सर्ट लिष्टिङ’ यसअघि हल्ला चलाइएकाहरु भने परेका छैनन् ।
