काठमाडौँ । जगदम्बा स्टिलका कर्मचारीहरुले मंगलबार विद्युत प्राधिकरणको कार्यालय घेराउ गर्ने भएका छन् । प्राधिकरणले डेडिकेटेड लाइनबाट बिजुली प्रयोग गरेको शुल्क नतिरेको भन्दै उद्योगको लाइन काटेपछि जगदम्बा स्टिलका ३५ सय कर्मचारीहरुले मंगलबार प्राधिकरणको सिमरास्थित सबस्टेसन रहेको कार्यालय घेराउ गर्न लागेका हुन् ।
प्राधिकरणका अनुसार जगदम्बा स्टिलले प्राधिकरणलाई विद्युत महसुलको बक्यौताबापत ४ अर्ब १४ करोड रुपैयाँ तिर्न बाँकी छ ।
तर, जगदम्बा स्टिलका सञ्चालक शाहिल अग्रवालले भने बिजुली प्रयोग गरेको प्रमाणबिना प्राधिकरणले फर्जी बिल पठाएर दादागिरी देखाएको आरोप लगाएका छन् । प्राधिकरणले लाइन काटेपछि तीन दिनदेखि कामबिहीन भएको भन्दै जगदम्बा स्टिलका ३५ सय कर्मचारीले प्राधिकरणको कार्यालय घेराउ गर्ने घोषणा गरेका हुन् ।
बिजुली लाइन काटेपछि उद्योग बन्द हुँदा दैनिक साढे दुई करोड रुपैयाँ घाटा भएको स्टिलका सञ्चालकल अग्रवालले बताएका छन् ।
