काठमाडौँ । धनगढीमा आसरा सुधार केन्द्र सञ्चालनमा आएको छ । उक्त सुधार केन्द्रको बुधबार एक कार्यक्रमकाबीच धनगढी उपमहानगरपालिकाका नगरप्रमुख गोपाल हमाल र सुदूरपश्चिम प्रदेश प्रहरी प्रमुख तथा प्रहरी नायब महानिरीक्षक भरत बहादुर बोहोराले संयुक्त रुपमा उद्घाटन गरेका हुन् ।
धनगढी उपमहानगरपालिकाको भौतिक सहयोग रहेको उक्त सुधार केन्द्र नेपाल प्रहरी श्रीमती संघको निगरानीमा रहनेछ ।
सुधार केन्द्र सञ्चालनका लागि कैलाली र कञ्चनपुरका २२ वटा स्थानीय तहहरुले आर्थिक सहयोग गर्ने सम्झौता गरेका छन् । आसरा सुधारकेन्द्र सञ्चालनका लागि भौतिक संरचनासहितको जग्गा २० वर्षका लागि लिए पनि यसले थप निरन्तरता पाउनेमा प्रहरी नायब महानिरीक्षक बोहोराले विश्वास व्यक्त गरेका छन् । ‘हालको लागि २० वर्षको सम्झौता भए पनि यस केन्द्रले त्यसप्रश्चात पनि निरन्तरता पाउने आशा राखेको छु’, उनले भने, ‘सुधार केन्द्र सञ्चालनमा आएसँगै लागूऔषध दुव्र्यसनी र यसको प्रभाव कम गर्न मद्दत पुग्नेछ ।’
त्यस्तै, नगरप्रमुख गोपाल हमालले पनि सुधारकेन्द्र स्थापनाले पछिल्लो समय लागूऔषध दुव्र्यसनीका कारण समाजमा फैलिएको विकृती नियन्त्रणमा सहयोग पुग्ने दाबी गरेका छन् ।
धनगढी उपमहानगरपालिका–१४ फुलवारीमा रहेको उक्त सुधार केन्द्रको क्षमता दुई सय जना रहेको छ । सुधारकेन्द्रमा राखिनेहरुलाई बिरामीसरह उपचार तथा परामर्श गरिनेछ । उक्त सुधार केन्द्रमा प्रहरीले एम्बुलेन्ससहितको सेवा उपलब्ध गराउने प्रहरी नायब महानिरीक्षक भरत बहादुर बोहोराले बताएका छन् । सुधार केन्द्रमा बस्नेहरुले उपचार, अध्ययन, खाना तथा अवास, पोसाक र मर्मत तथा सुधारबाफत न्यूनतम शुल्क केन्द्रलाई तिर्नुपर्नेछ ।
